ఓటర్ నమోదు ఫారమ్-6 (Form 6) లో ఎలాంటి మార్పులు చేయలేదని భారత ఎన్నికల సంఘం (ECI) స్పష్టం చేసింది. కొత్తగా అడిగిన వివరాలపై అంతర్గతంగా అభ్యంతరాలు వ్యక్తమైనప్పటికీ, అదనపు డేటా అడుగుతున్న విభాగం కేవలం అనుబంధ పత్రమని ఈసీ వాదిస్తోంది.
ఓటర్ రిజిస్ట్రేషన్ ప్రక్రియలో అంతర్గత విభేదాలు
కొత్త ఓటర్ల రిజిస్ట్రేషన్ కోసం ఉపయోగించే 'Form 6'లో అనుమతి లేకుండా మార్పులు చేశారనే ఆరోపణలను ఎన్నికల సంఘం (ECI) కొట్టిపారేసింది. గత 10 నెలలుగా ఈసీ పనితీరుపై, ముఖ్యంగా కమిషనర్లు సుఖ్బీర్ సింగ్ సంధు మరియు వివేక్ జోషి వ్యక్తం చేసిన అభ్యంతరాల నేపథ్యంలో ఈ ప్రకటన ప్రాధాన్యత సంతరించుకుంది.
అసలు గొడవ ఏంటి?
వివాదం అంతా 'స్పెషల్ ఇంటెన్సివ్ రివిజన్' (SIR) స్టేటస్కు సంబంధించిన ప్రశ్నల చుట్టూ తిరుగుతోంది. దరఖాస్తుదారులు తమ కుటుంబ సభ్యుల వివరాలను 2000వ సంవత్సరం నాటి ఎలక్టోరల్ రోల్స్ నుంచి వెల్లడించాల్సి వస్తోంది. ఇది తప్పనిసరి కాదని ఈసీ చెబుతున్నప్పటికీ, డిజిటల్ పోర్టల్ మాత్రం ఈ వివరాలు నమోదు చేయనిదే సబ్మిషన్ ఆమోదించడం లేదు. దీనిపై కమిషనర్లు స్పందిస్తూ, 1960 నాటి 'రిజిస్ట్రేషన్ ఆఫ్ ఎలెక్టర్స్ రూల్స్'లో మార్పులు చేయకుండా ఇలాంటి నిబంధనలు తీసుకురావడం చట్టవిరుద్ధమని వాదించారు.
టెక్నికల్ వాదన..
ఈ అంతర్గత సంక్షోభాన్ని పరిష్కరించేందుకు, ఈసీ తన వాదనను ఇలా వినిపించింది: Form 6లో ఎలాంటి మార్పులు చేయలేదు, అడిగిన వివరాలన్నీ 'అనెక్చర్-డి' (Annexure D) అనే ప్రత్యేక పత్రంలో భాగమని తెలిపింది. అయితే, మాజీ సీఈసీ ఓపీ రావత్, మాజీ కమిషనర్ అశోక్ లావాస వంటి వారు ప్రస్తుత కమిషనర్ల అభ్యంతరాలు సరైనవేనని మద్దతు తెలపడం గమనార్హం. విధానపరమైన స్వయంప్రతిపత్తిపై పెరుగుతున్న విమర్శల నడుమ, SIR నిబంధన మాత్రం ఇప్పటికీ అమలులోనే ఉంది.