ఉత్తరప్రదేశ్‌లోని మౌలానా మహమ్మద్ అలీ జౌహర్ యూనివర్సిటీపై ఎన్‌ఫోర్స్‌మెంట్ డైరెక్టరేట్ (ED) కొరడా ఝుళిపించింది. ప్రభుత్వ నిధులు, కాంట్రాక్టులను దుర్వినియోగం చేసి ఈ ప్రైవేట్ వర్సిటీని నిర్మించారన్న ఆరోపణలతో ఏకంగా రూ. 1,170 కోట్ల విలువైన భూములు, భవనాలను అటాచ్ చేసింది.
ప్రభుత్వ నిధులను, కాంట్రాక్టులను మళ్లించి యూనివర్సిటీ సామ్రాజ్యాన్ని నిర్మించారనే ఆరోపణలపై ED సుదీర్ఘ విచారణ చేపట్టింది. ఈ మేరకు మౌలానా మహమ్మద్ అలీ జౌహర్ యూనివర్సిటీకి చెందిన రూ. 1,170 కోట్ల విలువైన ఆస్తులను తాత్కాలికంగా జప్తు చేసినట్లు ప్రకటించింది.
నిధుల మళ్లింపు వెనుక కథ..
ఈ మొత్తం వ్యవహారం మాజీ మంత్రి ఆజం ఖాన్‌కు సంబంధించినదిగా అధికారులు పేర్కొంటున్నారు. దర్యాప్తులో తేలిన గణాంకాల ప్రకారం, వర్సిటీ నిర్మాణానికి జరిగిన మొత్తం ఖర్చులో కేవలం ₹72.63 కోట్లు మాత్రమే సరైన లెక్కల్లో ఉన్నాయి. మిగిలిన భారీ మొత్తం ప్రభుత్వ కాంట్రాక్టర్ల నుంచి బలవంతంగా వసూలు చేసినవి లేదా ప్రభుత్వ ప్రాజెక్టులకు కేటాయించిన నిధుల నుంచి మళ్లించినవేనని ఏజెన్సీ తేల్చింది.
అక్రమాల చిట్టా..
- పబ్లిక్ వర్క్స్ డిపార్ట్‌మెంట్ (PWD) కాంట్రాక్టర్లపై ఒత్తిడి తెచ్చి ఆ నిధులను ట్రస్ట్‌కు మళ్లించినట్లు ఆధారాలు సేకరించారు.
- ఆసుపత్రులు, హాస్టళ్ల కోసం కేటాయించిన స్థానిక అభివృద్ధి నిధులను వర్సిటీ సొంత అవసరాలకు వాడుకున్నారు.
- భూములపై పట్టు సాధించేందుకు ప్రభుత్వ ఉత్తర్వులను సైతం వెనుక తేదీలతో మార్పులు చేసినట్లు దర్యాప్తులో వెల్లడైంది.
ప్రస్తుతం మాజీ మంత్రి ఇప్పటికే పలు ఫోర్జరీ కేసుల్లో జైలు శిక్ష అనుభవిస్తుండగా, ఈ కొత్త మనీలాండరింగ్ కేసు ఆయనకు మరింత ఇబ్బందికరంగా మారింది. వ్యవసాయ భూముల ఆక్రమణలు, శత్రు ఆస్తుల (Enemy Property) దుర్వినియోగంపై కూడా ఏజెన్సీలు నిశితంగా పరిశీలిస్తున్నాయి.