Reliance Capital మరియు అనిల్ అంబానీపై CBI చీటింగ్ కేసు నమోదు చేసింది. 2012-2018 మధ్య కాలంలో LIC పెట్టిన పెట్టుబడుల్లో జరిగిన అవకతవకలే దీనికి ప్రధాన కారణమని సమాచారం.
అసలు వివాదం ఏంటి?
సెంట్రల్ బ్యూరో ఆఫ్ ఇన్వెస్టిగేషన్ (CBI) తాజాగా అనిల్ ధీరూభాయ్ అంబానీతో పాటు Reliance Capital, మరియు మాజీ గ్రూప్ మేనేజింగ్ డైరెక్టర్ సతీష్ సేత్లపై క్రిమినల్ కుట్ర, మోసపూరిత సెక్షన్ల కింద కేసులు నమోదు చేసింది. 2012 నుండి 2018 మధ్య కాలంలో LIC సంస్థ Reliance Capital జారీ చేసిన నాన్-కన్వర్టబుల్ డిబెంచర్లలో సుమారు ₹3,900 కోట్లు పెట్టుబడి పెట్టింది. అయితే, ఆ నిధులను చెప్పిన ప్రయోజనాలకు కాకుండా, మళ్ళించారని CBI ఆరోపిస్తోంది. దీని వల్ల LIC కి ₹2,684.5 కోట్ల భారీ నష్టం వాటిల్లిందని FIRలో పేర్కొన్నారు.
ఇన్సాల్వెన్సీ ప్రక్రియలో కొత్త చిక్కులు
రిలయన్స్ క్యాపిటల్ ఇప్పటికే NCLT పర్యవేక్షణలో ఇన్సాల్వెన్సీ ప్రక్రియను ఎదుర్కొంటోంది. 2021 నవంబర్లో గవర్నెన్స్ సమస్యల కారణంగా RBI ఈ సంస్థ బోర్డును రద్దు చేసి, అడ్మినిస్ట్రేటర్ను నియమించింది. ప్రస్తుతం ఈ సంస్థను హిందూజా గ్రూపుకు చెందిన IndusInd International Holdings Ltd (IIHL) కొనుగోలు చేసే ప్రక్రియ కొనసాగుతోంది. ఇలాంటి కీలక సమయంలో సీబీఐ ఎంట్రీ ఇవ్వడం సంస్థకు పెద్ద తలనొప్పిగా మారింది.
అనిల్ అంబానీ వర్గం స్పందన
ఈ ఆరోపణలపై అనిల్ అంబానీ ప్రతినిధి స్పందిస్తూ, ఈ కేసు కేవలం Reliance Capitalకు సంబంధించిందని పేర్కొన్నారు. 2021 నవంబర్ వరకు అనిల్ అంబానీ నాన్-ఎగ్జిక్యూటివ్ డైరెక్టర్గా మాత్రమే ఉన్నారని, తప్పు జరిగిందన్న ఆరోపణలను ఆయన పూర్తిగా ఖండిస్తున్నారని తెలిపారు. చట్టపరమైన మార్గాల్లో ఈ కేసును ఎదుర్కొంటామని స్పష్టం చేశారు.