Flydubai ఫ్లైట్‌లో సెప్టెంబర్ 30న జరిగిన కాక్‌పిట్ దాడి ఘటనలో విచారణ ముమ్మరమైంది. ఈ కేసుతో సంబంధం ఉందన్న అనుమానంతో యునైటెడ్ అరబ్ ఎమిరేట్స్ (UAE) అధికారులు మాల్దీవులకు చెందిన ఇద్దరు పైలట్లను అదుపులోకి తీసుకున్నారు.
సెప్టెంబర్ 30న జరిగిన ఫ్లైట్ FZ1073 ఘటన అంతర్జాతీయంగా కలకలం రేపింది. దుబాయ్ నుంచి టెల్ అవీవ్ వెళ్తున్న విమానంలో ఓమాన్ కో-పైలట్ హమ్మామ్ అల్-హమ్మామి, భారతీయ కెప్టెన్ స్మిత్ మచ్చర్‌పై గొడ్డలితో దాడికి ప్రయత్నించడం కలకలం రేపింది. ప్రయాణికులు, సిబ్బంది సమయస్ఫూర్తితో కెప్టెన్‌ను రక్షించి, విమానాన్ని సౌదీ అరేబియాలోని తబూక్‌లో అత్యవసరంగా ల్యాండ్ చేశారు. ఈ ఘటనను UAE అధికారులు 'టెర్రరిస్ట్ అటాక్'గా వర్గీకరించారు.
NIA ఎంట్రీతో పెరిగిన తీవ్రత
ప్రస్తుతం అదుపులోకి తీసుకున్న ఇద్దరు మాల్దీవుల పైలట్లు, ప్రధాన నిందితుడితో కలిసి నివసించినట్లు తేలడంతో విచారణ కీలక మలుపు తిరిగింది. బాధితుడు భారతీయ పైలట్ కావడంతో, భారత జాతీయ దర్యాప్తు సంస్థ (NIA) రంగంలోకి దిగింది. 'యాంటీ-హైజాకింగ్ యాక్ట్' మరియు 'UAPA' చట్టాల కింద కేసులు నమోదు చేసి దర్యాప్తు చేపట్టింది.
నియామకాలపై ప్రశ్నార్థకాలు
ఓమాన్ అధికారుల నుంచి లైసెన్స్ తిరస్కరించబడిన వ్యక్తిని ఫ్లైదుబాయ్ ఎలా నియమించుకుందనే అంశంపై విమానయాన సంస్థ ఇప్పుడు తీవ్ర విమర్శలు ఎదుర్కొంటోంది. దీనితో పాటు, ప్రయాణికులు భారీ స్థాయిలో క్లాస్-యాక్షన్ దావా వేయడం, టెల్ అవీవ్ రూట్‌ను నిలిపివేయడం వంటి పరిణామాలు సంస్థకు పెద్ద ఆర్థిక, కార్యకలాప సవాళ్లుగా మారాయి. భవిష్యత్తులో ఈ సంస్థ తీసుకునే భద్రతా చర్యలపై ఇన్వెస్టర్లు, వాటాదారులు నిశితంగా గమనిస్తున్నారు.