చైనా టెక్నాలజీపై అతిగా ఆధారపడటం ప్రమాదకరమని జర్మన్ ఇంటెలిజెన్స్ ఏజెన్సీ BfV హెచ్చరించింది. డేటా చోరీ, రిమోట్ షట్‌డౌన్ ముప్పు నేపథ్యంలో జర్మనీ తన కీలక మౌలిక సదుపాయాలను రక్షించుకునేందుకు 'డీ-రిస్కింగ్' బాట పట్టింది. ఇది గ్లోబల్ సప్లై చైన్‌లను మార్చే అవకాశం ఉంది.
టెక్నాలజీపై నిఘా నీడలు
జర్మనీకి చెందిన దేశీయ గూఢచారి సంస్థ, BfV, చైనా టెక్నాలజీపై తీవ్ర ఆందోళన వ్యక్తం చేసింది. పార్లమెంటరీ ప్యానెల్ ముందు ఏజెన్సీ చీఫ్ సినాన్ సెలెన్ మాట్లాడుతూ, చైనా ఉత్పత్తులపై ప్రస్తుతం ఉన్న అతిపెద్ద డిపెండెన్సీ దేశ భద్రతకే ముప్పుగా మారిందని స్పష్టం చేశారు.
డేటా చోరీ నుంచి రిమోట్ షట్‌డౌన్ వరకు..
కేవలం సైబర్ సెక్యూరిటీ మాత్రమే కాకుండా, ఈ టెక్నాలజీ ద్వారా కీలక సమాచారాన్ని సేకరించి విదేశీ ఏజెన్సీలకు చేరవేసే అవకాశం ఉందని అధికారులు భావిస్తున్నారు. అంతకంటే ప్రమాదకరమైన విషయం ఏమిటంటే, ఇండస్ట్రియల్ హార్డ్‌వేర్‌ను రిమోట్ ద్వారా షట్‌డౌన్ చేసే సామర్థ్యం చైనాకు ఉండటమే. యుద్ధం లేదా భౌగోళిక ఉద్రిక్తతలు తలెత్తినప్పుడు ఇది దేశ మౌలిక సదుపాయాలను అస్తవ్యస్తం చేయగలదు.
కొత్త ఎకనామిక్ సెక్యూరిటీ ప్యాకేజీ
2023 నుంచి చైనాను 'సిస్టమిక్ రైవల్'గా ప్రకటించిన జర్మనీ, ఇప్పుడు మరింత కఠినంగా వ్యవహరిస్తోంది. దీనిలో భాగంగానే 2026 అక్టోబర్ మధ్య నాటికి కొత్త ఎకనామిక్ సెక్యూరిటీ చట్టాలను తీసుకురానుంది. వీటి ద్వారా BfV, BND వంటి సంస్థలకు అదనపు అధికారాలు దక్కనున్నాయి. దీని వల్ల కంపెనీలు తమ సప్లై చైన్‌లను చైనాకు దూరంగా జరుపుకోవాల్సిన పరిస్థితి రావొచ్చు.
ఇన్వెస్టర్లపై ప్రభావం
ఈ పరిణామం యూరప్ దాటి భారత్ వంటి దేశాలపై కూడా ప్రభావం చూపే అవకాశం ఉంది. ముఖ్యంగా ఆటోమొబైల్, ఇంజనీరింగ్ రంగాల్లో జర్మనీ కంపెనీలు చైనా భాగాలను తొలగించి, ప్రత్యామ్నాయ సరఫరాదారుల కోసం వెతకాల్సి ఉంటుంది. ఇది కొత్త అవకాశాలను తెచ్చిపెట్టినప్పటికీ, షార్ట్ టర్మ్ లో ఖర్చులు పెరగడం, ఆపరేషనల్ ఇబ్బందులు ఎదురవ్వడం వంటి సవాళ్లు కూడా ఉన్నాయి.