భారతదేశంలో వర్షాలు, వరదలు కారు యజమానులకు పెద్ద తలనొప్పిగా మారాయి. సాధారణ ఇన్సూరెన్స్ పాలసీలు అన్నీ కవర్ చేయవు. కాబట్టి, జీరో డిప్రిసియేషన్, రిటర్న్ టు ఇన్వాయిస్, ఇంజిన్ ప్రొటెక్షన్ మరియు రోడ్సైడ్ అసిస్టెన్స్ వంటి ముఖ్యమైన యాడ్-ఆన్స్ తీసుకోవడం ద్వారా భారీ ఆర్థిక నష్టాల నుంచి బయటపడవచ్చు.
వర్షాలు పడితే నగరాల్లో రోడ్లు చెరువులను తలపిస్తున్నాయి. సాధారణ మోటార్ ఇన్సూరెన్స్ పాలసీ ప్రమాదాలు, దొంగతనాలకు మాత్రమే పనికొస్తుంది, కానీ వరద నీటి వల్ల ఇంజిన్ లేదా పార్ట్స్ పాడైతే మాత్రం ఇన్సూరెన్స్ క్లెయిమ్ రావడం కష్టం. అందుకే ఈ సీజన్లో ఈ క్రింది అదనపు రక్షణ కవచాలు చాలా అవసరం.
జీరో డిప్రిసియేషన్ (Zero Depreciation)
సాధారణ పాలసీల్లో ప్లాస్టిక్, రబ్బర్, గ్లాస్ పార్ట్స్ పై డిప్రిసియేషన్ తీసేస్తారు. కానీ, దాదాపు ₹1,500 అదనపు ప్రీమియంతో 'జీరో డిప్రిసియేషన్' తీసుకుంటే, విడిభాగాలను మార్చేటప్పుడు కంపెనీ మొత్తం ఖర్చును భరిస్తుంది. చిన్నపాటి వరదల్లో కూడా ఈ చిన్న విడిభాగాలు పాడయ్యే అవకాశం ఉంటుంది కాబట్టి ఇది చాలా ఉపయోగకరం.
రిటర్న్ టు ఇన్వాయిస్ (Return to Invoice - RTI)
ఒకవేళ మీ కారు పూర్తిగా పాడైపోయినా (Total Loss) లేదా దొంగిలించబడినా, సాధారణ ఇన్సూరెన్స్లో IDV (Insured Declared Value) మాత్రమే వస్తుంది. ఇది కారు అసలు ధర కంటే తక్కువ ఉంటుంది. కానీ RTI ఉంటే, కారు కొన్నప్పుడు ఉన్న ఇన్వాయిస్ మొత్తం, టాక్సులు కలిపి చెల్లిస్తారు. ఏడాదికి సుమారు ₹1,000 అదనపు ఖర్చుతో మీ కొత్త కారుకు భద్రత లభిస్తుంది.
ఇంజిన్ ప్రొటెక్షన్ (Engine Protection)
వర్షాకాలంలో అందరూ భయపడేది 'హైడ్రోస్టాటిక్ లాక్' గురించి. ఇంజిన్లోకి నీరు చేరితే రిపేర్ ఖర్చు లక్షల్లో ఉంటుంది. అయితే, ఒక ముఖ్యమైన విషయం గుర్తుంచుకోండి: వరదలో కారు చిక్కుకున్నప్పుడు ఇంజిన్ స్టార్ట్ చేయడానికి ప్రయత్నిస్తే ఇన్సూరెన్స్ కంపెనీ క్లెయిమ్ రిజెక్ట్ చేస్తుంది. అందుకే, ఇంజిన్ ప్రొటెక్షన్ కవర్ ఉండి, కారు స్టార్ట్ చేయకుండా ఉంటేనే మీకు ఈ క్లెయిమ్ వస్తుంది.
రోడ్సైడ్ అసిస్టెన్స్ (Roadside Assistance)
వరద నీటిలో కారు ఆగిపోయినప్పుడు, అడ్డదిడ్డంగా టోయింగ్ చేయడం వల్ల కారుకు ఇంకా ఎక్కువ నష్టం జరుగుతుంది. రోడ్సైడ్ అసిస్టెన్స్ ఉంటే, ప్రొఫెషనల్ టోయింగ్ సేవలు అందుతాయి. బ్యాటరీ జంప్ స్టార్ట్, మైనర్ రిపేర్స్ వంటి సౌకర్యాలు కూడా ఇందులో లభిస్తాయి. వర్షాలు ముదిరే లోపే మీ పాలసీలో ఈ సదుపాయం ఉందో లేదో సరిచూసుకోవడం ఉత్తమం.