హెల్త్ ఇన్సూరెన్స్ రెన్యూవల్ అంటే కేవలం ప్రీమియం కట్టడం మాత్రమే కాదు. దేశంలో మెడికల్ ఇన్ఫ్లేషన్ **14%** పెరిగిన నేపథ్యంలో, మీ కవరేజీ సరిపోతుందో లేదో ప్రతి ఏటా చెక్ చేసుకోవడం చాలా ముఖ్యం.
చాలామంది హెల్త్ ఇన్సూరెన్స్ రెన్యూవల్‌ను ఒక రొటీన్ పనిలా చూస్తారు. ప్రీమియం కట్టగానే అయిపోయిందని అనుకుంటారు. కానీ, ఇది మీ ఆర్థిక భవిష్యత్తుపై పెద్ద ప్రభావం చూపే అవకాశం ఉంది. ఇండియాలో మెడికల్ ఇన్ఫ్లేషన్ ఏడాదికి సుమారు 14% పెరుగుతోంది. ఐదేళ్ల క్రితం తీసుకున్న పాలసీ ఇప్పుడు హాస్పిటల్ ఖర్చులకు సరిపోకపోవచ్చు.
సమ్ ఇన్సూరెడ్ (Sum Insured) పెంచండి
ప్రస్తుత కాలంలో సర్జరీలు, డయాగ్నోస్టిక్స్ ఖర్చులు విపరీతంగా పెరిగాయి. మీ పాలసీలో ₹5 లక్షలు లేదా ₹10 లక్షలు కవర్ ఉంటే, అవి ప్రస్తుత మెడికల్ ఖర్చులకు సరిపోకపోవచ్చు. రెన్యూవల్ చేసే ముందు మీకు నచ్చిన హాస్పిటల్స్‌లో ట్రీట్‌మెంట్ ఖర్చులను ఒకసారి పరిశీలించండి. కవరేజీ తక్కువగా అనిపిస్తే, సమ్ ఇన్సూరెడ్ పెంచడం ఉత్తమం.
నిబంధనలను నిశితంగా గమనించండి (Fine Print)
ప్రీమియం ధర పెరిగినప్పుడు గుడ్డిగా చెల్లించకండి. అది ఎందుకు పెరిగిందో తెలుసుకోండి. తక్కువ ప్రీమియం కోసం చూసి, రూమ్-రెంట్ క్యాప్స్ (Room-rent caps) లేదా కో-పేమెంట్ (Co-payment) వంటి కఠినమైన నిబంధనలు ఉన్న పాలసీలను ఎంచుకోవద్దు. IRDAI నిబంధనల ప్రకారం, పాలసీలో ఏవైనా మార్పులు ఉంటే 90 రోజుల ముందే ఇన్సూరెన్స్ కంపెనీలు మీకు సమాచారం అందించాలి.
క్యాష్‌లెస్ హాస్పిటల్ నెట్‌వర్క్
మీకు నచ్చిన హాస్పిటల్ గత ఏడాది ఇన్సూరెన్స్ నెట్‌వర్క్‌లో ఉండవచ్చు, కానీ ఈ ఏడాది ఉండకపోవచ్చు. కాబట్టి, ప్రస్తుత నెట్‌వర్క్ లిస్ట్‌ను ఒకసారి సరిచూసుకోండి. ఎమర్జెన్సీ సమయంలో హాస్పిటల్ మారితే ఇబ్బందులు ఎదుర్కోవాల్సి వస్తుంది.
పోర్టబిలిటీ ఎంపిక
ప్రస్తుత పాలసీ నచ్చకపోతే, వేరే కంపెనీకి మారే అవకాశం (Portability) ఉంది. అయితే, ఇది పాత పాలసీ గడువు ముగియకముందే ప్లాన్ చేసుకోవాలి. మధ్యలో ఒక్క రోజు గ్యాప్ వచ్చినా మీ పాత వెయిటింగ్ పీరియడ్ బెనిఫిట్స్ పోయే ప్రమాదం ఉంది.