ఆస్ట్రేలియా నుంచి దిగుమతి చేసుకునే కోకింగ్ కోల్ మీద అతిగా ఆధారపడకుండా ఉండేందుకు SAIL కీలక అడుగు వేసింది. మంగోలియా నుంచి కోల్ దిగుమతి సాధ్యమేనా? దీనివల్ల లాజిస్టిక్ ఖర్చులు పెరిగే అవకాశం ఉందా? అనేది ఇన్వెస్టర్లు గమనించాల్సిన విషయం.
స్టీల్ తయారీలో కీలకమైన కోకింగ్ కోల్ కోసం ఆస్ట్రేలియాపై ఉన్న అతిపెద్ద డిపెండెన్సీని తగ్గించుకోవాలని Steel Authority of India (SAIL) భావిస్తోంది. ఇందులో భాగంగా మంగోలియా నుంచి ఒక మెట్రిక్ టన్ కోకింగ్ కోల్ శాంపిల్ ని తెప్పించి, దాని నాణ్యతను పరీక్షించింది.
ఎందుకు ఈ మార్పు?
స్టీల్ తయారీ ఖర్చులో దాదాపు 40% వాటా కోకింగ్ కోల్ కే ఖర్చవుతుంది. ప్రస్తుతం భారత్ తన అవసరాల్లో 95% దిగుమతుల ద్వారానే తీర్చుకుంటోంది, అందులో సగానికి పైగా ఆస్ట్రేలియా నుంచే వస్తాయి. అక్కడ ధరల్లో హెచ్చుతగ్గులు వస్తే, నేరుగా SAIL లాభాలపై (Profit Margins) ప్రభావం పడుతోంది.
సవాలుగా మారిన లాజిస్టిక్స్
మంగోలియా చుట్టూ చైనా, రష్యా దేశాలు ఉండటంతో, అక్కడి నుంచి కోల్ ని ఇండియాకు తరలించడం అత్యంత ఖరీదైన వ్యవహారం. చైనాతో ఉన్న భౌగోళిక రాజకీయ ఉద్రిక్తతల వల్ల రష్యా మీదుగా మార్గాన్ని అన్వేషించాల్సి వస్తోంది. కానీ, ఈ రవాణా ఖర్చులు ఆస్ట్రేలియా నుంచి వచ్చే కోల్ ధరతో పోటీ పడతాయా అన్నదే అసలు ప్రశ్న. ఒకవేళ రవాణా ఖర్చులు పెరిగితే, ఈ ప్రయోగం వల్ల పెద్దగా ప్రయోజనం ఉండకపోవచ్చు.
భవిష్యత్తులో SAIL యాజమాన్యం తీసుకునే నిర్ణయాలు, ఈ లాజిస్టిక్ ఖర్చుల ప్రభావం కంపెనీ ఆపరేషనల్ మార్జిన్లపై ఎలా ఉండబోతుందనేది ఇన్వెస్టర్లు నిశితంగా గమనించాలి.