ఔషధ ధరల నిర్ణయ ప్రక్రియపై సుప్రీంకోర్టు తీవ్ర అసహనం వ్యక్తం చేసింది. ఆర్థిక విధానాల కంటే ప్రజారోగ్యమే ముఖ్యమని స్పష్టం చేయడంతో, నవంబర్ 9 నుండి అమల్లోకి రానున్న 137 క్యాన్సర్ మందుల ధరల పరిమితిపై (30% Trade Margin Cap) ఇన్వెస్టర్లలో ఆందోళన మొదలైంది.
భారతీయ ఔషధ రంగంపై సుప్రీంకోర్టు చేసిన తాజా వ్యాఖ్యలు హెల్త్‌కేర్ సెక్టార్‌లో కొత్త అనిశ్చితిని సృష్టించాయి. జస్టిస్ విక్రమ్ నాథ్, జస్టిస్ సందీప్ మెహతా నేతృత్వంలోని బెంచ్, ప్రభుత్వ ధరల నిర్ణయ విధానాన్ని తప్పుబట్టింది. పరిశ్రమల సౌలభ్యం కంటే సామాన్యుల ప్రాణాలకు ప్రాధాన్యత ఇవ్వాలని కోర్టు గట్టిగా చెప్పింది.
నవంబర్ 9 డెడ్‌లైన్
ఈ కీలక పరిణామం 137 నాన్-షెడ్యూల్డ్ యాంటీ-క్యాన్సర్ మందులపై 30% ట్రేడ్ మార్జిన్ క్యాప్ అమలుకు కొద్ది రోజుల ముందే జరగడం గమనార్హం. ప్రస్తుత నేషనల్ ఫార్మాస్యూటికల్ ప్రైసింగ్ అథారిటీ (NPPA) పనితీరుపై కూడా కోర్టు అసంతృప్తి వ్యక్తం చేసింది.
ఇన్వెస్టర్లు ఎందుకు భయపడుతున్నారు?
ఒకవేళ కోర్టు ఒత్తిడితో ప్రభుత్వం మరిన్ని మందులకు ధరల నియంత్రణను విస్తరిస్తే, ఫార్మా కంపెనీల లాభాలపై తీవ్ర ప్రభావం పడుతుంది. ఇప్పటివరకు కంపెనీలు తమ రీసెర్చ్ ఖర్చులను ధరల పెంపు ద్వారా భర్తీ చేసుకునేవి, కానీ ఇప్పుడు ఆ అవకాశం తగ్గనుంది. అలాగే, ప్రైవేట్ ఆసుపత్రులు మందుల అమ్మకాలపై వేసే భారీ మార్జిన్లు కూడా తగ్గి, వాటి బిజినెస్ మోడల్స్ మారే ప్రమాదం ఉంది.
భవిష్యత్తులో కోర్టు ఇచ్చే తుది తీర్పు కోసం ఇన్వెస్టర్లు ఎదురుచూస్తున్నారు. ఈ మార్జిన్ కటింగ్ వల్ల కంపెనీల అర్నింగ్స్ ఎంత వరకు తగ్గుతాయో వేచి చూడాలి.