దేశవ్యాప్తంగా వాయు కాలుష్యం వల్ల వచ్చే అనారోగ్య సమస్యలను ట్రాక్ చేసేందుకు కేంద్ర ఆరోగ్య శాఖ సిద్ధమైంది. ఇకపై శ్వాసకోశ సమస్యలతో వచ్చే రోగుల డేటాను WHO నిబంధనల ప్రకారం నమోదు చేయాలని ఆసుపత్రులను ఆదేశించింది.
దేశంలో రోజురోజుకు పెరుగుతున్న వాయు కాలుష్యం, దానివల్ల ప్రజల ఆరోగ్యంపై పడుతున్న ప్రభావాన్ని అంచనా వేసేందుకు కేంద్ర ఆరోగ్య శాఖ కఠిన నిబంధనలను తెరపైకి తెచ్చింది. ముఖ్యంగా సెప్టెంబర్ నుండి ఫిబ్రవరి వరకు వాయు కాలుష్యం తీవ్రస్థాయికి చేరే నెలల్లో, ఆసుపత్రులు మరియు శ్వాసకోశ చికిత్స కేంద్రాలు రోగుల డేటాను ప్రతిరోజూ నమోదు చేయాల్సి ఉంటుంది.
WHO మార్గదర్శకాల అమలు
ఇప్పటివరకు ఉన్న అస్తవ్యస్తమైన రికార్డులను పక్కనపెట్టి, ప్రపంచ ఆరోగ్య సంస్థ (WHO) నిర్దేశించిన డయాగ్నోస్టిక్ కోడ్‌లను ఉపయోగించి రోగుల వివరాలను నమోదు చేయాలని కేంద్రం స్పష్టం చేసింది. ఈ సమాచారాన్ని 'నేషనల్ ప్రోగ్రామ్ ఆన్ క్లైమేట్ చేంజ్ అండ్ హ్యూమన్ హెల్త్' ద్వారా అనుసంధానించనున్నారు.
హాస్పిటల్స్ పై అదనపు భారం
ఈ కొత్త నిబంధనల వల్ల వైద్య సిబ్బందిపై అదనపు పనిభారం పడనుంది. ఆస్తమా, శ్వాసకోశ సమస్యలు, గుండె సంబంధిత ఇబ్బందులు కాలుష్యం వల్లే వచ్చాయా లేదా ఇతర కారణాలా అని వేరు చేయడం వైద్యులకు పెద్ద సవాలుగా మారనుంది. రోగుల వివరాల నమోదు ప్రక్రియలో సమయం ఎక్కువ పట్టే అవకాశం ఉందని నిపుణులు భావిస్తున్నారు.
ఇన్సూరెన్స్ రంగానికి సంకేతాలు
ఈ డేటా సేకరణ భవిష్యత్తులో హెల్త్ ఇన్సూరెన్స్ ప్రీమియంలపై ప్రభావం చూపే అవకాశం ఉంది. ఒకవేళ కాలుష్యానికి మరియు ఆసుపత్రి అడ్మిషన్లకు మధ్య స్పష్టమైన సంబంధం కనిపిస్తే, భవిష్యత్తులో ఇన్సూరెన్స్ కంపెనీలు రిస్క్ అసెస్‌మెంట్‌ను మార్చే ఛాన్స్ ఉంది. అయితే, ఇది కేవలం అడ్మినిస్ట్రేటివ్ మార్పు మాత్రమేనని, కాలుష్య నియంత్రణకు అసలైన చర్యలు తీసుకోవాల్సిన అవసరం ఉందని నిపుణులు గుర్తు చేస్తున్నారు.