కేవలం ఎలక్ట్రిక్ వాహనాల (EV)పైనే ఆధారపడకుండా, CNG, LNG మరియు బయో గ్యాస్‌లను కూడా ప్రోత్సహించాలని TERI తన తాజా రిపోర్టులో సూచించింది. నెట్-జీరో లక్ష్యాలను చేరుకోవడంలో ఈ మిశ్రమ విధానం కీలకమని నిపుణులు చెబుతున్నారు.
ఎనర్జీ ట్రాన్సిషన్‌లో ఎలక్ట్రిక్ వాహనాలే (EV) సర్వస్వమని భావించే వారికి TERI (The Energy and Resources Institute) కొత్త కోణాన్ని పరిచయం చేసింది. వాహన తయారీ నుంచి స్క్రాపింగ్ వరకు జరుగుతున్న పూర్తి లైఫ్ సైకిల్‌ను పరిశీలిస్తే, ప్రస్తుత పవర్ గ్రిడ్ ఆధారంగా చూస్తే CNG వాహనాలే తక్కువ పర్యావరణ ప్రభావాన్ని కలిగి ఉన్నాయని ఈ అధ్యయనం స్పష్టం చేస్తోంది.
సెగ్మెంట్ వారీగా ఎనర్జీ స్ట్రాటజీ
ఈ నివేదిక ప్రకారం, ప్రతి రవాణా రంగానికి ఒక నిర్దిష్టమైన ఇంధనం అవసరం. టూ-వీలర్స్, త్రీ-వీలర్స్ సెగ్మెంట్‌లో EVలు ఖచ్చితంగా లాభదాయకమే. కానీ, కమర్షియల్ ట్రాన్స్‌పోర్ట్ విషయానికి వస్తే CNG చాలా బెస్ట్ ఆప్షన్ అని TERI చెబుతోంది. ఎందుకంటే దేశవ్యాప్తంగా ఇప్పటికే దీనికి సంబంధించిన ఇన్‌ఫ్రాస్ట్రక్చర్ సిద్ధంగా ఉంది. ఇక భారీ వాహనాలు, సుదూర ప్రాంతాలకు వెళ్లే ట్రక్కుల విషయంలో బ్యాటరీల కంటే LNG (Liquid Natural Gas) మెరుగైన ఫలితాలను ఇస్తుందని ఈ రిపోర్ట్ తేల్చి చెప్పింది.
పాలసీ మార్పులు - ఇన్వెస్టర్లకు సంకేతాలు
నేషనల్ ఫ్యూయల్ పాలసీలో భాగంగా సహజ వాయువును (Natural Gas) GST పరిధిలోకి తీసుకురావాలని పరిశోధకులు కోరుతున్నారు. ప్రస్తుతం సహజ వాయువు GST పరిధిలో లేకపోవడం వల్ల రాష్ట్రాల వారీగా వేర్వేరు వ్యాట్లు (VAT) అమలవుతున్నాయి. ఒకే పన్ను విధానం అమలులోకి వస్తే, ఎనర్జీ సెక్టార్‌లో పెట్టుబడులు పెరిగే అవకాశం ఉంది.
ఇన్వెస్టర్లు ఇప్పుడు సిటీ గ్యాస్ డిస్ట్రిబ్యూషన్ (CGD) కంపెనీల వైపు చూడాల్సిన సమయం ఆసన్నమైంది. ఆటో మొబైల్ రంగంలో కేవలం EVలపైనే కాకుండా, గ్యాస్ ఆధారిత ఇంజిన్లను తయారు చేసే కంపెనీల బ్యాలెన్స్ షీట్లు కూడా భవిష్యత్తులో బలంగా ఉండే ఛాన్స్ ఉంది. అయితే, ప్రభుత్వం GST అమలుపై తీసుకునే నిర్ణయాలు, LNG కారిడార్ల అభివృద్ధిపై చేసే ఖర్చును బట్టి ఈ సెక్టార్ గమనం మారుతుంది.
భవిష్యత్ కార్యాచరణ
భారత్ 2070 నాటికి నెట్-జీరో లక్ష్యాన్ని చేరుకోవాలంటే, కేవలం ఇంధనం మార్చడమే కాకుండా.. బ్యాటరీ రీసైక్లింగ్, బయో గ్యాస్ వినియోగం వంటి అంశాలపై కూడా దృష్టి పెట్టాల్సి ఉంటుంది. వ్యవసాయ వ్యర్థాల నుంచి బయో గ్యాస్ తయారు చేయడం వల్ల ఇంధన స్వావలంబన పెరుగుతుందని నిపుణులు సూచిస్తున్నారు.