గుజరాత్‌లో బొగ్గు కొరత, పెరిగిన విద్యుత్ డిమాండ్ కారణంగా పరిశ్రమలపై ప్రభుత్వం ఆంక్షలు విధించింది. సాయంత్రం 5 గంటల నుండి రాత్రి 11 గంటల వరకు విద్యుత్ వినియోగంపై ఆంక్షలు ఉండటంతో, కీలక రంగాల ఉత్పత్తిపై ప్రభావం పడే అవకాశం ఉంది.
గుజరాత్ విద్యుత్ గ్రిడ్ తీవ్ర ఒత్తిడిలో ఉండటంతో అక్కడి పారిశ్రామిక యూనిట్లకు కష్టాలు మొదలయ్యాయి. ఉత్తర్ గుజరాత్ విజ్ కంపెనీ లిమిటెడ్ (Uttar Gujarat Vij Company Ltd) తాజా ఆదేశాల ప్రకారం, సాయంత్రం 5 నుండి రాత్రి 11 గంటల వరకు పరిశ్రమలు విద్యుత్ వినియోగాన్ని తగ్గించుకోవాల్సి ఉంటుంది. గ్రిడ్ స్థిరత్వాన్ని కాపాడేందుకు ప్రభుత్వం ఈ కఠిన నిర్ణయం తీసుకుంది.
ఇన్వెస్టర్లపై ప్రభావం ఎలా ఉంటుంది?
గుజరాత్ రాష్ట్రం కెమికల్స్, టెక్స్‌టైల్స్, ఫార్మాస్యూటికల్స్ మరియు ఇంజనీరింగ్ రంగాళ్లకు పెద్ద హబ్. ఈ పరిశ్రమలకు నిరంతరం విద్యుత్ అవసరం. ఇప్పుడున్న ఆంక్షల వల్ల:
- ఉత్పత్తి ఆలస్యం: నిర్దేశిత సమయాల్లో పని తగ్గించడం వల్ల అవుట్‌పుట్ తగ్గుతుంది.
- ఖర్చుల పెరుగుదల: డీజిల్ జనరేటర్లను వాడితే ఆపరేషనల్ కాస్ట్ భారీగా పెరిగి, కంపెనీల ప్రాఫిట్ మార్జిన్స్‌పై నెగటివ్ ప్రభావం చూపే ప్రమాదం ఉంది.
జాతీయ స్థాయిలో సమస్య
సెంట్రల్ ఎలక్ట్రిసిటీ అథారిటీ డేటా ప్రకారం, దేశవ్యాప్తంగా అనేక థర్మల్ పవర్ ప్లాంట్లలో బొగ్గు నిల్వలు ప్రమాదకర స్థాయిలో తగ్గాయి. దీనికి తోడు అకాల వేడి వల్ల నీటిపారుదల రంగానికి కరెంట్ డిమాండ్ పెరగడంతో గ్రిడ్ వ్యవస్థ గడ్డు పరిస్థితులను ఎదుర్కొంటోంది. సరైన బ్యాటరీ స్టోరేజ్ టెక్నాలజీ లేకపోవడంతో, పగలు ఉత్పత్తి అయ్యే సోలార్ ఎనర్జీని పీక్ అవర్స్‌లో వాడుకోలేకపోతున్నాం.
ప్రస్తుత పరిస్థితుల్లో, గుజరాత్‌లో ప్లాంట్లను కలిగి ఉన్న కంపెనీల మేనేజ్‌మెంట్ కామెంటరీపై ఇన్వెస్టర్లు దృష్టి సారించాలి. అధిక విద్యుత్ ఖర్చులను కంపెనీలు తమ కస్టమర్లపైకి నెట్టగలవా లేదా అనేది రాబోయే క్వార్టర్లీ రిజల్ట్స్‌లో కీలక అంశం కానుంది.