కౌటిల్య ఎకనామిక్ కాన్క్లేవ్‌లో ప్రముఖ ఆర్థికవేత్త Daniel Waldenström కీలక వ్యాఖ్యలు చేశారు. యూరోపియన్ దేశాల్లోని కఠినమైన నిబంధనలతో పోలిస్తే, విద్య మరియు పెట్టుబడి అనుకూల పన్ను విధానాలతో భారత్ వేగంగా అభివృద్ధి చెందుతోందని ఆయన స్పష్టం చేశారు.
న్యూఢిల్లీలో జరిగిన 5వ కౌటిల్య ఎకనామిక్ కాన్క్లేవ్‌లో స్వీడన్ ఆర్థికవేత్త Daniel Waldenström ప్రపంచ ఆర్థిక ధోరణులపై ఆసక్తికరమైన విశ్లేషణ చేశారు. పశ్చిమ దేశాలతో పోలిస్తే భారత ఆర్థిక ప్రయాణం మరింత పటిష్టంగా ఉందని ఆయన అభిప్రాయపడ్డారు. ముఖ్యంగా యూరోప్‌లో భారీగా ఉన్న నిబంధనలు, పన్నుల భారం అక్కడి వ్యాపారాల ఉత్పాదకతను దెబ్బతీస్తున్నాయని, దీనివల్ల ఆ దేశాలు ఆర్థిక స్తబ్దత (Economic Inertia) వైపు వెళ్తున్నాయని ఆయన హెచ్చరించారు.
పన్ను విధానాల్లో వ్యత్యాసం
పెట్టుబడులను ప్రోత్సహించే విషయంలో భారత్ అనుసరిస్తున్న విధానాలు బాగున్నాయని Waldenström పేర్కొన్నారు. సంపద పన్ను (Wealth Tax) లేదా వారసత్వ పన్ను కంటే.. కార్పొరేట్ లాభాలు, డివిడెండ్లపై పన్ను విధించడం ద్వారా పెట్టుబడులకు ఊతం ఇవ్వవచ్చని ఆయన సూచించారు. ఇది నూతన ఆవిష్కరణలకు, మౌలిక సదుపాయాల కల్పనకు అవసరమైన మూలధనాన్ని సమకూరుస్తుందని వివరించారు.
AI యుగంలో భారత్ పాత్ర
ఆర్టిఫిషియల్ ఇంటెలిజెన్స్ (AI) ప్రపంచాన్ని మారుస్తున్న తరుణంలో భారత్ కు 100% పాజిటివ్ అవకాశాలు ఉన్నాయని ఆయన చెప్పారు. ఇంగ్లీష్ మాట్లాడగలిగే భారీ వర్క్‌ఫోర్స్, పెరుగుతున్న సాంకేతిక మౌలిక సదుపాయాలు భారత్‌కు పెద్ద ప్లస్ పాయింట్లు. అయితే, అంతర్జాతీయంగా పెరుగుతున్న అనిశ్చితి, గ్లోబల్ ఎనర్జీ సప్లై సమస్యల నేపథ్యంలో.. భారత్ తన ప్రైవేట్ ప్రాపర్టీ రైట్స్, ఫ్రీ ట్రేడ్ విధానాలకు కట్టుబడి ఉండటం చాలా ముఖ్యమని ఆయన సూచించారు.
చివరగా, గ్లోబల్ మార్కెట్లలో వడ్డీ రేట్లు, క్యాపిటల్ ఫ్లో ఆంక్షల వల్ల వచ్చే సవాళ్లను భారత్ ఎలా అధిగమిస్తుందనేదే రాబోయే కాలంలో అతి పెద్ద పరీక్ష అని ఆర్థిక నిపుణులు హెచ్చరిస్తున్నారు.