అక్టోబర్ 2026లో భారత సర్వీస్ రంగం పుంజుకుంది. దేశీయ డిమాండ్ పెరగడంతో HSBC ఇండియా సర్వీస్ PMI **55.8** కి చేరుకుంది. అయితే, ఎగుమతుల ఆర్డర్లు **45 నెలల** కనిష్టానికి పడిపోవడం, నియామకాలు నిలిచిపోవడం ఆందోళన కలిగిస్తోంది.
అక్టోబర్ నెలలో భారత సర్వీస్ రంగం ఆశావహంగా కనిపించింది. జూన్ తర్వాత అత్యంత వేగవంతమైన వృద్ధిని నమోదు చేస్తూ, HSBC ఇండియా సర్వీస్ పర్చేజింగ్ మేనేజర్స్ ఇండెక్స్ (PMI) సెప్టెంబర్‌లోని 55.2 స్థాయి నుండి 55.8కి పెరిగింది. ఈ ఇండెక్స్‌లో 50 పాయింట్ల కంటే ఎక్కువ ఉంటే అది వృద్ధిగా పరిగణించబడుతుంది.
ఈ వృద్ధికి ప్రధాన కారణం దేశీయంగా కొత్త వ్యాపారాలు పెరగడమే. గ్లోబల్ అనిశ్చితి ఉన్నప్పటికీ, భారత్ లోని అంతర్గత వినియోగం ఆర్థిక వ్యవస్థకు వెన్నుదన్నుగా నిలుస్తోంది. ఇక మాన్యుఫాక్చరింగ్ మరియు సర్వీస్ రంగాలు రెండింటిని కలిపే కాంపోజిట్ PMI కూడా 56.2కి బలోపేతం కావడం గమనార్హం.
ఎగుమతులు, నియామకాల్లో సవాళ్లు
దేశీయంగా ఆర్డర్లు బాగున్నప్పటికీ, ఎగుమతుల పరిస్థితి ఆందోళనకరంగా ఉంది. ఎగుమతి ఆర్డర్లు గత 45 నెలల్లో ఎన్నడూ లేనంత బలహీనంగా నమోదయ్యాయి. ముఖ్యంగా IT, బిజినెస్ సర్వీస్ రంగాల్లోని కంపెనీలకు ఇది ప్రతికూల అంశం. అలాగే, కంపెనీలు కొత్త నియామకాల విషయంలో చాలా జాగ్రత్తగా ఉంటున్నాయి. హయ్యరింగ్ వృద్ధి దాదాపు 10 నెలల కనిష్టానికి పడిపోయింది. కొత్త ప్రాజెక్టులు వస్తున్నా, కంపెనీలు కొత్త సిబ్బందిని తీసుకోవడానికి బదులు ప్రస్తుత వనరులతోనే పని పూర్తి చేసేందుకు మొగ్గు చూపుతున్నాయి.
ద్రవ్యోల్బణం, లాభాలపై ప్రభావం
ఖర్చుల విషయంలో కంపెనీలకు స్వల్ప ఊరట లభించింది. లేబర్, విద్యుత్, రవాణా వంటి ఇన్‌పుట్ ఖర్చుల పెరుగుదల గత 6 ఏళ్ల కనిష్టానికి తగ్గింది. ఇది కంపెనీల మార్జిన్లకు మద్దతునిచ్చే అవకాశం ఉంది. అయితే, ధరల పెంపు వేగం 4 నెలల కనిష్టానికి తగ్గడం, కంపెనీలPricing Powerపై ఒత్తిడి ఉందనే సంకేతాలను ఇస్తోంది. రాబోయే రోజుల్లో దేశీయ డిమాండ్, ఎగుమతుల బలహీనతను ఎంతవరకు భర్తీ చేయగలదనే దానిపైనే ఇన్వెస్టర్ల దృష్టి నెలకొంది.