భారతీయ జాబ్ మార్కెట్లో ఆసక్తికరమైన గణాంకాలు వెల్లడయ్యాయి. మొత్తం ఉద్యోగ దరఖాస్తుల్లో మహిళల వాటా **43.5%** కి పెరిగింది, కానీ వారికి కేటాయించిన రోల్స్ మాత్రం కేవలం **13%** మాత్రమే ఉండటం కార్పొరేట్ రిక్రూట్మెంట్లో ఉన్న అసమానతలను బయటపెడుతోంది.
వర్క్ఇండియా రోజ్గార్ రిపోర్ట్ 2026 ఏం చెబుతోంది?
'వర్క్ఇండియా రోజ్గార్ రిపోర్ట్ 2026' ప్రకారం, గత ఏడాదితో పోలిస్తే మహిళా అభ్యర్థుల సంఖ్య 40.4% నుండి 43.5% కి పెరిగింది. అయితే, కంపెనీలు మాత్రం మహిళలను ప్రత్యేకంగా టార్గెట్ చేస్తూ ఇచ్చే జాబ్ పోస్టింగ్లను మాత్రం 13% దగ్గరే ఉంచాయి. మార్పు చెందుతున్న వర్క్ఫోర్స్కు అనుగుణంగా కార్పొరేట్ హైరింగ్ స్ట్రాటజీలు ఇంకా మారలేదని ఇది స్పష్టం చేస్తోంది.
పోటీ పెరిగింది.. కొలువుల లభ్యత తగ్గింది
ప్రస్తుతం జాబ్ మార్కెట్లో పోటీ తీవ్రమైంది. గతేడాది కంటే దరఖాస్తుల సంఖ్య 65% పెరగగా, కొత్త ఉద్యోగాల లభ్యత మాత్రం 40-48% వృద్ధితో వెనుకబడి ఉంది. దీనివల్ల IT, HR, మరియు అకౌంటింగ్ వంటి రంగాల్లో అభ్యర్థులపై ఒత్తిడి పెరిగింది. సరఫరా ఎక్కువగా ఉండటంతో ఎంట్రీ లెవల్ వేతనాల వృద్ధి పరిమితం అయ్యే అవకాశం ఉంది.
రంగాల వారీగా ట్రెండ్స్
సేల్స్ రంగంలో 56 లక్షలకు పైగా దరఖాస్తులు రావడం మార్కెట్ లో వస్తున్న మార్పుకు నిదర్శనం. అదే సమయంలో, టీచింగ్ (86.6%) మరియు బ్యూటీ సర్వీసెస్ (80.7%) రంగాల్లో మహిళల ప్రాధాన్యత స్థిరంగా కొనసాగుతోంది.
ప్రాంతీయ భాషలకు ప్రాధాన్యత
ప్రస్తుతం 92% జాబ్ పోస్టింగ్లకు ఇంగ్లీష్ పరిజ్ఞానం తప్పనిసరి కాదు. హిందీ లేదా ఇతర ప్రాంతీయ భాషలు తెలిస్తే చాలు అన్న నిబంధన వల్ల, మెట్రో నగరాలకు మాత్రమే పరిమితం కాకుండా టైర్-2, టైర్-3 నగరాల్లోని టాలెంట్ను కంపెనీలు అందిపుచ్చుకుంటున్నాయి. దీర్ఘకాలంలో కంపెనీలు తమ పనితీరును మెరుగుపరచుకోవాలంటే మహిళా ఉద్యోగుల కోసం సురక్షితమైన, సమ్మిళిత కార్యాలయ వాతావరణాన్ని కల్పించడం ఇప్పుడు అనివార్యమని ఆర్థిక నిపుణులు సూచిస్తున్నారు.