కొత్త సబ్సిడీల పద్ధతి అస్తవ్యస్తంగా ఉందని IMF హెచ్చరించింది. భారత్ వంటి అభివృద్ధి చెందుతున్న దేశాల్లో భారీ సబ్సిడీలు బడ్జెట్ లోటును పెంచుతున్నాయని, దీనివల్ల దీర్ఘకాలిక ఆర్థిక ప్రయోజనాలు దెబ్బతింటున్నాయని నివేదిక వెల్లడించింది.
అంతర్జాతీయ ద్రవ్య నిధి (IMF) తన తాజా అక్టోబర్ 2026 'వరల్డ్ ఎకనామిక్ అవుట్‌లుక్'లో సంచలన విషయాలు వెల్లడించింది. సాధారణ ప్రజలకు ఇచ్చే సబ్సిడీలు, ముఖ్యంగా ఇంధనం మరియు ఆహార ధరలపై ఇచ్చే రాయితీలు, ప్రభుత్వ ఖజానాపై విపరీతమైన భారాన్ని మోపుతున్నాయని సంస్థ ఆందోళన వ్యక్తం చేసింది. ఈ రాయితీలు అవసరమైన వారికి చేరడం కంటే, ధనిక వర్గాలకే ఎక్కువ ప్రయోజనాన్ని చేకూరుస్తున్నాయని IMF స్పష్టం చేసింది.
సామర్థ్యం లేని ఖర్చు
IMF లెక్కల ప్రకారం, టార్గెటెడ్ క్యాష్ ట్రాన్స్‌ఫర్స్ కంటే సబ్సిడీలు ఇవ్వడం 3 నుంచి 6 రెట్లు ఎక్కువ ఖర్చుతో కూడుకున్నది. అదే ప్రొడ్యూసర్ సబ్సిడీల విషయంలోనైతే ఈ వ్యత్యాసం 14 నుంచి 22 రెట్లు ఎక్కువగా ఉంది. అంటే ప్రభుత్వాలు పెడుతున్న ఖర్చులో సింహభాగం వృథా అవుతోందని అర్థం.
భారత్ ఆర్థిక పరిస్థితిపై ప్రభావం
ప్రస్తుతం భారత్ ఎదుర్కొంటున్న అతిపెద్ద సవాలు ఫిస్కల్ డెఫిసిట్. పెట్రోల్, డీజిల్పై ఎక్సైజ్ సుంకాలు తగ్గించడం ద్వారా సామాన్యులకు ఊరట లభించినప్పటికీ, ఇది ప్రభుత్వ ఖజానాపై ప్రభావం చూపుతోంది. మార్కెట్ అంచనాల ప్రకారం, FY27 లో ఫిస్కల్ డెఫిసిట్ 4.7% నుంచి 4.9% వరకు ఉండే అవకాశం ఉంది. ఇది ప్రభుత్వం నిర్దేశించుకున్న 4.3% లక్ష్యం కంటే ఎక్కువ.
ఈ సబ్సిడీ భారం వల్ల క్యాపిటల్ ఎక్స్‌పెండిచర్ (CAPEX) తగ్గాల్సిన పరిస్థితి ఏర్పడుతోంది. మౌలిక సదుపాయాల కల్పనకు కేటాయించాల్సిన నిధులు రాయితీలకే వెళ్తుండటంతో దీర్ఘకాలిక వృద్ధి రేటుపై ఒత్తిడి పెరుగుతోంది. గ్లోబల్ గ్రోత్ రేటు 3.1% కి పడిపోతున్న నేపథ్యంలో, ఆర్థిక క్రమశిక్షణ పాటించకపోతే అప్పుల భారం పెరిగే ప్రమాదం ఉందని ఇన్వెస్టర్లు గమనించాలి.