Financial Intelligence Unit of India (FIU-IND) కీలక నిర్ణయం తీసుకుంది. మనీ లాండరింగ్ నిబంధనలను పాటించని **15** ఆఫ్-షోర్ క్రిప్టో ప్లాట్ఫామ్లను బ్లాక్ చేయాలని ఆదేశించింది. దీంతో భారతీయ ఇన్వెస్టర్ల నిధుల భద్రతపై ఆందోళన మొదలైంది.
దేశంలో క్రిప్టో మార్కెట్ పై నిఘా పెంచిన FIU-IND, నిబంధనలను ఉల్లంఘించిన 15 వర్చువల్ డిజిటల్ అసెట్ (VDA) సర్వీస్ ప్రొవైడర్లపై కొరడా ఝళిపించింది. ఈ సంస్థలు 'Prevention of Money Laundering Act (PMLA), 2002' కింద రిజిస్ట్రేషన్ చేసుకోకపోవడంతో ఈ చర్యలు తీసుకున్నట్లు అధికారులు వెల్లడించారు.
నిబంధనలు ఏంటి?
మార్చి 2023 నుంచి, భారతీయ వినియోగదారులకు సేవలు అందిస్తున్న ఏ సంస్థ అయినా తప్పనిసరిగా FIU-IND వద్ద రిజిస్టర్ అవ్వాలని ప్రభుత్వం ఆదేశించింది. సంస్థలు ఎక్కడ ఉన్నా సరే, భారత్ లో వ్యాపారం చేయాలంటే ఈ నిబంధనలు వర్తిస్తాయి.
బ్యాన్ అయిన ప్రముఖ ప్లాట్ఫామ్లు
ప్రస్తుతం బ్లాక్ చేయబడిన జాబితాలో Weex, Blofin, Bitunix, DigiFinex, XT.com, WOO X, Pionex, WhiteBIT వంటి ప్లాట్ఫామ్లు ఉన్నాయి. ఇన్ఫర్మేషన్ టెక్నాలజీ యాక్ట్, 2000 సెక్షన్ 79(3)(b) ప్రకారం ఈ యాప్స్ మరియు వెబ్సైట్లను యాక్సెస్ చేయకుండా నిరోధించాలని ప్రభుత్వం నిర్ణయించింది.
ఇన్వెస్టర్లకు ఎదురయ్యే రిస్క్!
ఈ నిర్ణయంతో చాలా మంది ఇన్వెస్టర్ల ఫండ్స్ మరియు డిజిటల్ వాలెట్లు బ్లాక్ అయ్యే ప్రమాదం ఉంది. ఈ సంస్థలు భారతీయ నియంత్రణ పరిధిలోకి రావు కాబట్టి, ఒకవేళ మీ అసెట్స్ నిలిచిపోతే ఎవరిని ఆశ్రయించాలో కూడా తెలియని పరిస్థితి ఏర్పడుతుంది. అంతేకాకుండా, ప్రభుత్వం క్రిప్టో ఆదాయంపై 30% ఫ్లాట్ టాక్స్ విధిస్తోంది. ఇలాంటి సమయంలో ఆఫ్-షోర్ ఎక్స్ఛేంజీలలో ట్రాన్సాక్షన్ హిస్టరీని ట్రాక్ చేయడం ఇన్వెస్టర్లకు పెద్ద తలనొప్పిగా మారుతుంది. ఇప్పటికైనా ఇన్వెస్టర్లు తమ హోల్డింగ్స్ మరియు ఆ ప్లాట్ఫామ్ల లభ్యతపై అప్రమత్తంగా ఉండాలని నిపుణులు హెచ్చరిస్తున్నారు.