Samsung India FY26 ఆర్థిక ఫలితాల్లో షాకింగ్ నంబర్స్ కనిపించాయి. కంపెనీ నెట్ ప్రాఫిట్ ఏకంగా **36%** తగ్గి **₹7,228.10 కోట్లకు** పరిమితమైంది. మొబైల్ హ్యాండ్సెట్స్ విభాగంలో తీవ్ర పోటీ, పెరిగిన ఖర్చుల ప్రభావం కంపెనీ ఆదాయంపై గట్టిగానే పడింది.
ఎక్కడ దెబ్బ తగిలిందంటే?
గత ఆర్థిక సంవత్సరంలో కంపెనీ ఆపరేటింగ్ రెవెన్యూ 1.2% పెరిగి ₹1.12 లక్షల కోట్లకు చేరినప్పటికీ, లాభాల విషయంలో మాత్రం భారీ క్షీణత కనిపించింది. ముఖ్యంగా కంపెనీ ప్రధాన ఆదాయ వనరు అయిన మొబైల్ హ్యాండ్సెట్స్ బిజినెస్ 1.35% తగ్గి ₹81,472.2 కోట్లకు పడిపోయింది. మార్కెట్లో Xiaomi, Vivo వంటి బ్రాండ్ల నుంచి వస్తున్న పోటీ, అలాగే ప్రీమియం సెగ్మెంట్లో Apple నుంచి ఎదురవుతున్న సవాళ్లుSamsung లాభాలను దెబ్బతీశాయి.
గెలిచిన విభాగాలు ఇవే!
మొబైల్ బిజినెస్లో ఇబ్బందులు ఉన్నా, హోమ్ అప్లయన్సెస్ (ఏసీలు, వాషింగ్ మెషీన్లు, ఫ్రిజ్లు) విభాగం 3.52% వృద్ధితో ₹12,240.60 కోట్ల ఆదాయాన్ని నమోదు చేసింది. అలాగే టీవీ, సౌండ్బార్ సేల్స్ 8.5% పెరిగి ₹8,055.90 కోట్లకు చేరాయి. దేశీయ మార్కెట్లో అమ్మకాలు 9.34% పెరగడం సానుకూల అంశం కాగా, ఎగుమతులు (Exports) 5.64% తగ్గి ₹41,068.60 కోట్లకు పరిమితమయ్యాయి.
ఖర్చుల భారం.. రాయల్టీల గుదిబండ
కంపెనీ ఆపరేటింగ్ ఖర్చులు 3.54% పెరిగి ₹1.04 లక్షల కోట్లకు చేరుకున్నాయి. లాభాల కోతను తట్టుకునేందుకు ప్రకటనలు, ప్రమోషన్ల కోసం చేసే ఖర్చును 11.9% తగ్గించి ₹3,850.50 కోట్లకు పరిమితం చేసింది. అయితే, సౌత్ కొరియాలోని మాతృ సంస్థకు చెల్లించే రాయల్టీలు మాత్రం 7.2% పెరిగి ₹3,474 కోట్లకు చేరడం గమనార్హం. రాబోయే రోజుల్లో ఎగుమతులు పుంజుకోవడం, మొబైల్ మార్కెట్లో మార్జిన్లను కాపాడుకోవడంపైనే Samsung భవిష్యత్తు ఆధారపడి ఉంటుంది.