మహారాష్ట్ర ఫుడ్ అండ్ డ్రగ్ అడ్మినిస్ట్రేషన్ (Maharashtra FDA) కీలక నిర్ణయం తీసుకుంది. ఇకపై మసాలా దినుసులను లూజ్ గా అమ్మడంపై నిషేధం విధిస్తూ, Ethylene Oxide వాడకాన్ని పూర్తిగా నిలిపివేయాలని ఆదేశాలు జారీ చేసింది. ఆహార భద్రతను మెరుగుపరచడమే లక్ష్యంగా తెచ్చిన ఈ నిబంధనలతో, అసంఘటిత రంగంలోని చిన్న వ్యాపారులపై భారం పడనుంది.
నిబంధనలు ఏంటంటే?
మహారాష్ట్ర FDA కొత్త మార్గదర్శకాల ప్రకారం, ఇకపై మసాలా దినుసులను విడిగా (Loose) అమ్మడం కుదరదు. ప్రతి ఉత్పత్తి తప్పనిసరిగా సీల్ చేసిన ప్యాకేజింగ్ మరియు లేబులింగ్ నిబంధనలను పాటించాలి. దీనితో పాటు, గత కొంతకాలంగా అంతర్జాతీయంగా వివాదాస్పదమైన Ethylene Oxide అనే రసాయనాన్ని స్టెరిలైజేషన్ కోసం వాడకూడదని స్పష్టం చేసింది. ఈ రూల్ తయారీదారులు, హోల్‌సేలర్లు, ఈ-కామర్స్ ప్లాట్‌ఫారమ్‌లకు వర్తిస్తుంది.
నాణ్యతపై ఫోకస్
ఈ క్రమంలోనే Metanil Yellow, Rhodamine B, Sudan dyes వంటి ప్రమాదకరమైన రంగులు, హానికరమైన అడిటివ్స్ వాడకాన్ని ప్రభుత్వం నిషేధించింది. ఉత్పత్తి కేంద్రాల్లో పరిశుభ్రత ఉండాలని, ముడి సరుకుల నుండి తయారీ వరకు పూర్తి ట్రాక్ రికార్డ్ (Traceability) నిర్వహించాలని FDA ఆదేశించింది.
మార్కెట్ మీద ప్రభావం
భారతీయ స్పైస్ మార్కెట్ ఇప్పటికీ అసంఘటిత రంగం (Unorganized sector) చేతిలోనే ఉంది. కొత్తగా తెచ్చిన ప్యాకేజింగ్, స్టెరిలైజేషన్ మరియు డాక్యుమెంటేషన్ ఖర్చులు చిన్న చిన్న వ్యాపారులకు తలకు మించిన భారంగా మారే అవకాశం ఉంది. అయితే, ఇప్పటికే ఆధునిక ప్యాకేజింగ్ పద్ధతులు పాటిస్తున్న పెద్ద బ్రాండెడ్ సంస్థలకు ఇది ఒక గొప్ప అవకాశం. వినియోగదారులు కూడా భవిష్యత్తులో సురక్షితమైన ప్యాక్డ్ ప్రొడక్ట్స్ వైపు మరింత మొగ్గు చూపే అవకాశం ఉంది.
Food Safety and Standards Act, 2006 ప్రకారం నిబంధనలు పాటించని వారికి స్టాక్ సీజ్ చేయడం, లైసెన్స్ రద్దు చేయడం వంటి కఠిన చర్యలు ఉంటాయని ప్రభుత్వం హెచ్చరించింది.