భారత కన్స్యూమర్ ఎలక్ట్రానిక్స్ మార్కెట్ రూపురేఖలు మారుతున్నాయి. బడ్జెట్ ఫ్రెండ్లీ డివైజ్‌లను పక్కనపెట్టి, లాభాల కోసం కంపెనీలు ప్రీమియం మోడల్స్‌పైనే ఎక్కువగా దృష్టి సారిస్తున్నాయి. దీనివల్ల సామాన్యులకు అందుబాటు ధరల్లో ఉన్న గ్యాడ్జెట్లు తగ్గిపోతున్నాయి.
ప్రస్తుతం భారత ఎలక్ట్రానిక్స్ మార్కెట్లో కీలక మార్పులు చోటుచేసుకుంటున్నాయి. జూలై-సెప్టెంబర్ త్రైమాసికంలో డేటాను పరిశీలిస్తే, కొత్త ప్రొడక్ట్ వేరియంట్ల సంఖ్య 257 గా స్థిరంగా ఉన్నప్పటికీ, ప్రత్యేక మోడల్స్ సంఖ్య 153 నుండి 144 కి పడిపోయింది. అంటే కంపెనీలు తక్కువ రకాల ఉత్పత్తులను ఎక్కువ వేరియంట్లతో విడుదల చేస్తూ, మార్కెట్‌ను అధిక ధరల వైపు నడిపిస్తున్నాయి.
స్మార్ట్‌ఫోన్ల రేట్లు పరుగులు
స్మార్ట్‌ఫోన్ విభాగంలో బేస్ మోడల్ ధరలు ఏటా 14% పెరుగుతున్నాయి. ముఖ్యంగా ₹1 లక్ష కంటే ఎక్కువ ధర ఉన్న అల్ట్రా-ప్రీమియం ఫోన్ల హవా నడుస్తోంది. గత క్వార్టర్‌లో కేవలం 5 వేరియంట్లు మాత్రమే రాగా, ఈసారి అది 26 కు పెరిగింది. ఇది ఇన్వెస్టర్లకు మార్జిన్లు పెరిగే అవకాశం కనిపిస్తున్నప్పటికీ, ధరల పట్ల సున్నితంగా ఉండే భారతీయ వినియోగదారుల నుంచి ఎంతవరకు ఆదరణ లభిస్తుందనేది ప్రశ్నార్థకమే.
ల్యాప్‌టాప్ మార్కెట్లో కొరత
ల్యాప్‌టాప్ విభాగంలో ప్రీమియం ఫీవర్ మరీ ఎక్కువగా ఉంది. ఇప్పుడు వస్తున్న కొత్త ల్యాప్‌టాప్‌లలో సగానికి పైగా ₹1.5 లక్షల ధర దాటేస్తున్నాయి. ముఖ్యంగా ₹50,000 నుండి ₹75,000 మధ్య బడ్జెట్ ల్యాప్‌టాప్‌లు కరువయ్యాయి. కేవలం 3 కొత్త మోడళ్లు మాత్రమే ఈ ధరల శ్రేణిలో విడుదలయ్యాయి. గత ఏడాది కాలంలో మార్కెట్లో ఉన్న ల్యాప్‌టాప్ బ్రాండ్ల సంఖ్య 13 నుండి 8 కి తగ్గి, మార్కెట్ ఏకీకరణ (Consolidation) దిశగా వెళ్తోంది.
టీవీలు మరియు ఎంట్రీ లెవల్ డివైజ్‌ల పరిస్థితి
టెలివిజన్ రంగంలో LG వంటి సంస్థలు OLED డిస్‌ప్లేలు, హై-ఎండ్ ప్లాట్‌ఫారమ్‌లపైనే దృష్టి సారిస్తున్నాయి. ₹30,000 లోపు ధర గల టీవీ మోడల్స్ మార్కెట్ వాటా క్రమంగా తగ్గుతోంది. అలాగే, ₹10,000 లోపు ధర ఉండే బడ్జెట్ స్మార్ట్‌ఫోన్లు, టాబ్లెట్లు దొరకడం కష్టంగా మారింది. కంపెనీలు ప్రీమియం ఫీచర్ల వైపు వెళ్లడం వల్ల, బడ్జెట్ కస్టమర్లు దూరమయ్యే ప్రమాదం లేకపోలేదు. ఈ వ్యూహం రాబోయే రోజుల్లో సేల్స్ వాల్యూమ్‌ను ఎలా ప్రభావితం చేస్తుందో చూడాలి.