అమ్మకాలు పెరిగినా.. లాభాలు ఎందుకు తగ్గాయి?
Eureka Forbes Q3 FY26 ఆర్థిక ఫలితాల్లో ఆపరేషన్స్ పరంగా చూస్తే, రెవెన్యూ 8.0% పెరిగి ₹645.4 కోట్లకు చేరుకుంది. అడ్జస్టెడ్ EBITDA 13.7% పెరిగి ₹73.2 కోట్లకు చేరింది. దీంతో అడ్జస్టెడ్ EBITDA మార్జిన్ కూడా 57 బేసిస్ పాయింట్లు మెరుగుపడి 11.3%కి చేరింది. అడ్జస్టెడ్ ప్రాఫిట్ ఆఫ్టర్ ట్యాక్స్ (PAT) 11.9% పెరిగి ₹39.0 కోట్లకు చేరింది.
అయితే, ఈ క్వార్టర్ లో కంపెనీ ₹40.4 కోట్ల అసాధారణ ఖర్చు (Exceptional item) నమోదైంది. కొత్త లేబర్ కోడ్స్ అమలు నేపథ్యంలో ఈ ఖర్చు వచ్చింది. దీని ప్రభావంతో రిపోర్టెడ్ PAT 74.2% పడిపోయి ₹9.0 కోట్లకు చేరింది. ఈ ఒక్కసారిగా వచ్చిన ఖర్చు, కంపెనీ అసలు పనితీరును దెబ్బతీసినట్లు విశ్లేషకులు భావిస్తున్నారు.
వ్యాపార విభాగాలు ఎలా పనిచేశాయి?
నీటి శుద్ధి పరికరాల (Water Purifiers) విభాగంలో కొంత మందకొడితనం కనిపించింది. మార్కెట్లో ఎక్కువ ఇన్వెంటరీ ఉండటం, పండుగల సీజన్ తర్వాత అమ్మకాలు తగ్గడం వంటి కారణాలున్నాయి. అయినప్పటికీ, ఈ విభాగంలో తమ మార్కెట్ వాటాను పెంచుకున్నామని కంపెనీ మేనేజ్మెంట్ చెబుతోంది.
మరోవైపు, రోబోటిక్స్ (Robotics) విభాగం మంచి వృద్ధిని కనబరిచింది. ఎయిర్ ప్యూరిఫైయర్స్ (Air Purifiers) అమ్మకాలు గత ఏడాదితో పోలిస్తే ఏకంగా 3 రెట్లు పెరిగాయి. సర్వీస్ బిజినెస్ కూడా వరుసగా మూడో క్వార్టర్లో డబుల్ డిజిట్ వృద్ధిని నమోదు చేసుకుంది.
భవిష్యత్ ప్రణాళికలు.. అంచనాలు
ఆర్థికంగా చూస్తే, Eureka Forbes చరిత్రలోనే తొలిసారిగా ₹300 కోట్ల నెట్ సర్ప్లస్ ని సాధించింది. రిటర్న్ ఆన్ క్యాపిటల్ ఎంప్లాయ్డ్ (ROCE) 350% పైన స్థిరంగా ఉంది.
భవిష్యత్ పై కంపెనీ మేనేజ్మెంట్ చాలా ఆశాభావంతో ఉంది. వచ్చే ఐదేళ్లలో (FY30 నాటికి) రెవెన్యూను 2 రెట్లు పెంచి ₹5,400-5,600 కోట్లకు, అడ్జస్టెడ్ EBITDA ని 3 రెట్లు పెంచి ₹800-850 కోట్లకు తీసుకురావాలని లక్ష్యంగా పెట్టుకుంది. పట్టణీకరణ, ఆదాయాలు పెరగడం వంటివి తమ వ్యాపారానికి ఊతమిస్తాయని కంపెనీ భావిస్తోంది. D2C హెల్త్ అండ్ హైజీన్ టెక్ లీడర్గా ఎదగాలనే లక్ష్యంతో, ₹79,999 ధరతో Aquaguard Arctic Blaze అనే కొత్త ప్రీమియం వాటర్ ప్యూరిఫైయర్ను కూడా విడుదల చేసింది.