యూరోపియన్ కమిషన్ కీలక ప్రతిపాదన చేసింది. పర్యావరణ కారణాల దృష్ట్యా 2027 మే నాటికి భారత్కు మెటల్ స్క్రాప్ ఎగుమతులను నిలిపివేయాలని భావిస్తోంది. ఇది మన దేశంలోని రీసైక్లింగ్ రంగంపై భారీ ప్రభావం చూపే అవకాశం ఉంది.
పర్యావరణ ప్రమాణాలను సాకుగా చూపిస్తూ యూరోపియన్ కమిషన్ ఈ సంచలన నిర్ణయం తీసుకుంది. నాన్-OECD దేశాలకు మెటల్ వ్యర్థాల ఎగుమతిని మే 21, 2027 నుంచి పూర్తిగా నిలిపివేయాలని ప్రతిపాదనల్లో పేర్కొంది. ప్రస్తుతం కాగితం, టెక్స్టైల్స్ వంటి వ్యర్థాల ఎగుమతికి అనుమతి ఉన్నప్పటికీ, మెటల్ వ్యర్థాల విషయంలో మాత్రం కఠినంగా వ్యవహరించనుంది. భారత్లోని లెడ్, మెర్క్యురీ, క్యాడ్మియం ప్రాసెసింగ్ ప్రమాణాలు తమ నిబంధనలకు అనుగుణంగా లేవని యూరప్ వాదన.
రీసైక్లింగ్ కంపెనీలకు సవాలు
ఈ నిర్ణయం భారత సెకండరీ మెటల్ పరిశ్రమకు పెద్ద గండంగా మారింది. మన దేశీయ రీసైక్లర్లు యూరప్ నుంచి వచ్చే స్క్రాప్పైనే ఎక్కువగా ఆధారపడుతున్నారు. 2025లోనే భారత్ సుమారు 366,000 టన్నుల అల్యూమినియం స్క్రాప్ను యూరప్ నుంచి దిగుమతి చేసుకుంది. ఈ బ్యాన్ అమల్లోకి వస్తే Gravita India, Pondy Oxides & Chemicals వంటి సంస్థలు కొత్త మార్గాలను వెతుక్కోవాల్సి ఉంటుంది. లేని పక్షంలో ముడి సరుకు కొరతతో పాటు, ప్రత్యామ్నాయ దేశాల నుంచి దిగుమతి చేసుకునే క్రమంలో లాజిస్టిక్స్ ఖర్చులు పెరిగి మార్జిన్లపై ప్రభావం చూపే అవకాశం ఉంది.
కీలక తేదీలు మరియు భవిష్యత్తు
ప్రస్తుతానికి ఇది కేవలం ముసాయిదా (Draft) మాత్రమే. దీనిపై అక్టోబర్ 2026 వరకు బహిరంగ చర్చలు జరుగుతాయి. అంతిమ నిర్ణయం నవంబర్ 21, 2026న వెలువడే అవకాశం ఉంది. ఒకవేళ భారత్ తన పర్యావరణ ప్రాసెసింగ్ ప్రమాణాలను అంతర్జాతీయ స్థాయికి పెంచుకుంటే, భవిష్యత్తులో ఈ నిషేధాన్ని సవరించే అవకాశం ఉంటుందని కమిషన్ సంకేతాలు ఇచ్చింది.