NSE కి చెందిన Electronic Gold Receipts (EGR) బిజినెస్ మరో ఐదేళ్లలో అంటే 2030 నాటికి ఏకంగా ₹1,260 కోట్ల వార్షిక ఆదాయాన్ని అందుకోనుందని బ్రోకరేజ్ సంస్థ Jefferies అంచనా వేస్తోంది.
నేషనల్ స్టాక్ ఎక్స్ఛేంజ్ (NSE) తన 'Electronic Gold Receipts' (EGR) విభాగంపై భారీ కసరత్తు చేస్తోంది. షాంఘై గోల్డ్ ఎక్స్ఛేంజ్ తరహాలో భారతదేశంలో ఒక పకడ్బందీ స్పాట్ మార్కెట్‌ను నిర్మించాలని ఎన్‌ఎస్‌ఈ భావిస్తోంది. ఈ క్రమంలోనే 2030 నాటికి ఈ విభాగం ద్వారా ₹1,260 కోట్ల ఆదాయం వస్తుందని బ్రోకరేజ్ సంస్థ Jefferies అంచనా వేసింది.
ఈ స్కీమ్ ఎందుకు ప్రత్యేకం?
సాధారణంగా ఉండే గోల్డ్ ETFలు లేదా సావరిన్ గోల్డ్ బాండ్ల (SGB) కంటే EGRలు భిన్నమైనవి. ఇన్వెస్టర్లు తమ డిజిటల్ గోల్డ్‌ను ఎప్పుడంటే అప్పుడు భౌతిక రూపంలోకి (Physical Gold) మార్చుకునే వెసులుబాటు ఇందులో ఉంది. అయితే, ఇలా మార్చుకున్నప్పుడు 3% వరకు GST చెల్లించాల్సి ఉంటుందనే విషయాన్ని ఇన్వెస్టర్లు గుర్తుంచుకోవాలి. ఈ పన్ను భారం రిటైల్ డిమాండ్‌పై ప్రభావం చూపే అవకాశం ఉంది.
ఎన్‌ఎస్‌ఈ మేనేజ్‌మెంట్ తన నెట్‌వర్క్‌ను విస్తరించే పనిలో ఉంది. వచ్చే ఏడాది నాటికి 1,000 కు పైగా కలెక్షన్ సెంటర్లను ఏర్పాటు చేయడమే కాకుండా, చిన్న మొత్తాల్లో కూడా గోల్డ్ కొనుగోలు చేసేలా తక్కువ డినామినేషన్ గల రిసీప్ట్‌లను ప్రవేశపెట్టనుంది.
ఇతర విభాగాల్లో కూడా జోరు
గోల్డ్ బిజినెస్‌తో పాటు ఎన్‌ఎస్‌ఈ తన కమోడిటీ డెరివేటివ్స్, మ్యూచువల్ ఫండ్ ఆర్డర్ ప్లాట్‌ఫారమ్‌లపై కూడా ఫోకస్ పెంచింది. ముఖ్యంగా WTI క్రూడ్ ఆయిల్ కాంట్రాక్టుల ద్వారా కమోడిటీ విభాగం ఆదాయం 2% కి పెరగవచ్చని అంచనా. అలాగే, ఫిన్‌టెక్ సంస్థలతో కలిసి మ్యూచువల్ ఫండ్ ప్లాట్‌ఫారమ్ మార్కెట్ వాటాను 35% కి తీసుకెళ్లాలని లక్ష్యంగా పెట్టుకుంది. ఈ కొత్త ప్రయత్నాలన్నీ కలిపి 2026 నాటికి సంస్థ లాభాల్లో 13% వాటాను అందించే అవకాశం ఉంది.