Yes Bank లోని ₹8,415 కోట్ల విలువైన AT-1 బాండ్లను మూడు రోజుల్లోగా పునరుద్ధరించాలని Axis Trustee కోరింది. లేనిపక్షంలో కోర్టు ధిక్కార చర్యలు తీసుకుంటామని హెచ్చరించడంతో ఇన్వెస్టర్లలో ఆందోళన మొదలైంది.
వివాదం ఎక్కడ మొదలైంది?
2020 మార్చిలో Yes Bank సంక్షోభంలో ఉన్న సమయంలో, సుమారు ₹8,415 కోట్ల విలువైన AT-1 బాండ్లను రైట్-డౌన్ (రద్దు) చేశారు. అయితే, దీనిపై జరిగిన సుదీర్ఘ న్యాయపోరాటంలో భాగంగా, 2023 జనవరిలో బాంబే హైకోర్టు ఈ నిర్ణయం చెల్లదని తీర్పు ఇచ్చింది. దీనిని తాజాగా సుప్రీంకోర్టు కూడా సమర్థించడంతో ఇప్పుడు బాండ్ల పునరుద్ధరణ అంశం తెరపైకి వచ్చింది.
Axis Trustee హెచ్చరిక
బాండ్ హోల్డర్ల తరపున వ్యవహరిస్తున్న Axis Trustee Services, బ్యాంకుకు మూడు రోజుల అల్టిమేటం ఇచ్చింది. NSDL, CDSL రికార్డులను అప్‌డేట్ చేయడం నుండి, బాండ్లను BSE, NSE లలో ట్రేడింగ్‌కు అందుబాటులోకి తెచ్చే వరకు అన్ని ప్రక్రియలను పూర్తి చేయాలని డిమాండ్ చేసింది. ఒకవేళ బ్యాంకు స్పందించకపోతే కోర్టు ధిక్కార చర్యలకు వెళ్తామని స్పష్టం చేసింది.
బ్యాంకు వాదన ఏంటి?
దీనిపై Yes Bank స్పందిస్తూ.. తాము కోర్టు ఆదేశాలను ఉద్దేశపూర్వకంగా ఉల్లంఘించడం లేదని స్పష్టం చేసింది. సుప్రీంకోర్టు తీర్పును పూర్తిగా పరిశీలిస్తున్నామని, చట్టబద్ధమైన మార్గంలోనే ముందుకు వెళ్తామని ఎక్స్‌ఛేంజ్ ఫైలింగ్‌లో పేర్కొంది. ఈ బాండ్లు 9% మరియు 9.5% కూపన్ రేట్లను కలిగి ఉండటం వల్ల, వీటి రీ-ఇంటిగ్రేషన్ బ్యాంకు బ్యాలెన్స్ షీట్‌పై పెద్ద ప్రభావం చూపనుంది.
ప్రస్తుతం ఇన్వెస్టర్లు బ్యాంకు తదుపరి అడుగుపైనే ఫోకస్ పెట్టారు. ఈ 3 రోజుల గడువులోగా బ్యాంకు ఎలాంటి నిర్ణయం తీసుకుంటుందో వేచి చూడాలి.