కాలేజీలో సీటు రావడం తొలి అడుగు మాత్రమే. బ్యాంకులు కో-బారోవర్ క్రెడిట్, కోర్సు అర్హత, డాక్యుమెంటేషన్ అన్నీ క్షుణ్ణంగా పరిశీలిస్తాయి. ఈ ప్రమాణాలు అందుకోలేకపోతే లోన్ రిజెక్ట్ అవ్వచ్చు. కాబట్టి, బ్యాంకింగ్ ప్రమాణాలు తెలుసుకోవడం ముఖ్యం.
చాలా మంది స్టూడెంట్స్, పేరెంట్స్ మంచి కాలేజీలో సీటు వస్తే ఎడ్యుకేషన్ లోన్ ఈజీగా వస్తుందని అనుకుంటారు. కానీ, బ్యాంకులు, NBFCలు ఎడ్యుకేషన్ లోన్లను సీరియస్ ఫైనాన్షియల్ ప్రొడక్ట్స్ గా పరిగణిస్తాయి. డబ్బులు ఇచ్చే ముందు చాలా కఠినమైన నిబంధనలు పాటిస్తాయి. కాలేజీలో సీటు వచ్చినా కూడా లోన్ రిజెక్ట్ అయ్యే ఛాన్స్ ఉంది. అప్పుడు చివరి నిమిషంలో డబ్బుల కోసం పరుగెత్తాల్సి వస్తుంది.
ఎందుకు రిజెక్ట్ అవుతుంది?
1. కో-బారోవర్ (Co-borrower) క్రెడిట్ హిస్టరీ: లోన్ తీసుకునేది స్టూడెంట్ అయినా, సాధారణంగా పేరెంట్ లేదా గార్డియన్ కో-బారోవర్ అవుతారు. స్టూడెంట్లకు సొంతంగా ఆదాయం ఉండదు, క్రెడిట్ హిస్టరీ కూడా తక్కువగా ఉంటుంది. కాబట్టి, లోన్ తిరిగి చెల్లించే సామర్థ్యం కో-బారోవర్ పైనే ఆధారపడుతుంది. పేరెంట్ కు క్రెడిట్ స్కోర్ (Credit Score) తక్కువగా ఉన్నా, ఎక్కువ EMI లు ఉన్నా, లేదా పేమెంట్స్ ఆలస్యం చేసిన చరిత్ర ఉన్నా.. బ్యాంక్ ఆ లోన్ ను రిస్క్ గా భావించవచ్చు. అప్లై చేసే ముందు కో-బారోవర్ క్రెడిట్ రిపోర్ట్ చెక్ చేసుకోవడం మంచిది.
2. కోర్సు & కాలేజీ అర్హత: బ్యాంకులు తమ అంతర్గత జాబితాలో ఆమోదించిన కాలేజీలు, కోర్సులను మాత్రమే పరిగణలోకి తీసుకుంటాయి. ప్రతి డిగ్రీ ప్రోగ్రామ్ కు ఒకే రకమైన లోన్ నిబంధనలు ఉండవు. కాలేజీల ర్యాంకింగ్, ప్లేస్మెంట్ రికార్డులు, అక్రిడిటేషన్ ఆధారంగా బ్యాంకులు వాటిని వర్గీకరిస్తాయి. ఒకవేళ కోర్సు లేదా కాలేజీ ఈ బెంచ్ మార్క్స్ ను అందుకోలేకపోతే, సెక్యూర్డ్ కాని లోన్ అప్లికేషన్ రిజెక్ట్ కావచ్చు. అంతేకాకుండా, RBI నిబంధనల ప్రకారం.. లోన్ తీసుకునేవారి భవిష్యత్ సంపాదన, క్యాష్ ఫ్లోస్ ను కూడా బ్యాంకులు పరిశీలించాలి. కాబట్టి, కోర్సు వల్ల ఉద్యోగం వస్తుందా లేదా అనేది కూడా బ్యాంక్ నిర్ణయంపై ప్రభావం చూపుతుంది.
3. డాక్యుమెంటేషన్ లోపాలు: అప్లికేషన్ ఫామ్ సరిగ్గా నింపకపోవడం, డాక్యుమెంట్లలో పేర్ల స్పెల్లింగ్ లో తేడాలు, కాలేజీ ఫీజు స్ట్రక్చర్ కి, లోన్ అడిగిన మొత్తానికి మధ్య వ్యత్యాసం వంటివి ప్రాసెసింగ్ ఆలస్యం అవ్వడానికి లేదా రిజెక్ట్ అవ్వడానికి కారణమవుతాయి. ఫీజు స్ట్రక్చర్, అడ్మిషన్ ప్రూఫ్, కో-బారోవర్ ఆదాయానికి సంబంధించిన డాక్యుమెంట్లు స్పష్టంగా ఉండాలి. వాస్తవ ఖర్చుల కంటే ఎక్కువ లోన్ అడగడం కూడా సమస్యలను సృష్టించవచ్చు.
పరిష్కారం:
ప్రభుత్వ పథకాలు (PM-Vidyalaxmi వంటివి) ఉన్నా, వాటికి కూడా నిర్దిష్ట మార్గదర్శకాలు ఉంటాయి. లోన్ కోసం అప్లై చేసేటప్పుడు పారదర్శకంగా, అన్ని వివరాలు సరిగ్గా ఇవ్వడంపై దృష్టి పెట్టాలి. లోన్ రిజెక్ట్ అయితే, అది సాధారణంగా ఒకే ఒక్క కారణం వల్ల జరగదు. క్రెడిట్ హిస్టరీ, కోర్సు అర్హత, లేదా కొలేటరల్ అవసరాలు.. ఇలా ఏది కారణమో తెలుసుకుని, ఆ సమస్యలను సరిదిద్దుకుని మళ్ళీ అప్లై చేస్తే లోన్ వచ్చే అవకాశాలు పెరుగుతాయి.