UPI యూజర్లను టార్గెట్ చేస్తూ సైబర్ నేరగాళ్లు కొత్త తరహా 'Fake Refund' స్కామ్‌లకు పాల్పడుతున్నారు. తెలియని వ్యక్తుల నుంచి వచ్చే డబ్బును రిఫండ్ చేసే క్రమంలో క్యూఆర్ కోడ్ (QR Code) స్కాన్ చేస్తే, మీ ఖాతాలోని డబ్బు మాయం అయ్యే ప్రమాదం ఉంది. ఈ మోసం నుంచి ఎలా తప్పించుకోవాలో తెలుసుకోండి.
ప్రస్తుతం దేశంలో UPI పేమెంట్స్ వాడేవారిని టార్గెట్ చేస్తూ 'Fake Refund' లేదా 'Jumped Deposit' పేరుతో భారీ మోసాలు జరుగుతున్నాయి. State Bank of India సహా పలు బ్యాంకులు ఈ విషయాన్ని సీరియస్ గా తీసుకుని యూజర్లను హెచ్చరిస్తున్నాయి. సైబర్ నేరగాళ్లు మన నమ్మకాన్ని ఆసరాగా చేసుకుని, సోషల్ ఇంజనీరింగ్ పద్ధతుల ద్వారా మీ బ్యాంక్ అకౌంట్ వివరాలను దోచుకుంటున్నారు.
మోసం ఎలా జరుగుతుంది?
ముందుగా స్కామర్లు మీ అకౌంట్‌కి కొంత డబ్బును పంపిస్తారు. ఆ తర్వాత ఫోన్ చేసి, "పొరపాటున మీకు డబ్బు పంపించాను, దయచేసి రిటర్న్ చేయండి" అని ఆందోళన చెందుతున్నట్లు నటిస్తారు. ఈ క్రమంలో, డబ్బు రిఫండ్ చేయడానికి ఒక 'QR Code' లేదా 'Payment Link' పంపిస్తారు. మీరు ఆ QR కోడ్ స్కాన్ చేసి, మీ UPI PIN నంబర్‌ను ఎంటర్ చేసిన మరుక్షణమే, మీ ఖాతా నుంచి డబ్బు డెబిట్ అవుతుంది. ఎందుకంటే, ఆ QR కోడ్ 'రిఫండ్' కోసం కాదు, అది మీ ఖాతా నుంచి డబ్బును 'Collect' చేయడానికి చేసే రిక్వెస్ట్.
గుర్తుంచుకోండి.. ఇది చాలా ముఖ్యం!
UPI నియమం ప్రకారం, డబ్బును రిసీవ్ చేసుకోవడానికి ఎప్పుడూ PIN నంబర్ ఎంటర్ చేయాల్సిన అవసరం లేదు. డబ్బులు పంపేటప్పుడు (Debit) మాత్రమే PIN అడుగుతుంది. ఎవరైనా QR కోడ్ పంపి, డబ్బు పంపమని అడిగితే అది ఖచ్చితంగా మోసమని గమనించండి.
మీరు ఏం చేయాలి?
ఒకవేళ మీ ఖాతాలోకి అనుకోకుండా డబ్బు వస్తే, ఆ వ్యక్తితో చాటింగ్ లేదా ఫోన్ కాల్స్ చేయకండి. మీ బ్యాంక్ అధికారిక యాప్ లేదా వెబ్‌సైట్‌లో లావాదేవీని స్వయంగా చెక్ చేసుకోండి. డబ్బు రివర్స్ చేయాలంటే, మీరు మీ బ్యాంక్ కస్టమర్ కేర్‌ను సంప్రదించి, అధికారికంగా ప్రాసెస్ చేయమని చెప్పాలి. ఇలా చేయడం వల్ల మీ అకౌంట్‌కి భద్రత ఉంటుంది.
ఒకవేళ మీరు ఈ స్కామ్ బారిన పడితే, వెంటనే 1930 నంబర్‌కు కాల్ చేసి సైబర్ క్రైమ్ విభాగంలో ఫిర్యాదు చేయండి. అలాగే cybercrime.gov.in పోర్టల్‌లో రిపోర్ట్ చేసి, మీ బ్యాంక్ ఖాతాను ఫ్రీజ్ చేయించండి.