భారతీయ బ్యాంకింగ్ రంగంలో రిస్క్ మేనేజ్‌మెంట్‌ను కఠినతరం చేస్తూ RBI కీలక ఆదేశాలు జారీ చేసింది. ముఖ్యంగా డెరివేటివ్స్ వ్యాపారం ఎక్కువగా ఉన్న బ్యాంకులు, అంతర్జాతీయ కార్యకలాపాలు నిర్వహించే సంస్థలు 2027, ఏప్రిల్ 1 నాటికి SA-CCR నిబంధనలను పాటించాలని స్పష్టం చేసింది.
భారతీయ బ్యాంకింగ్ వ్యవస్థను ప్రపంచ స్థాయి ప్రమాణాలకు అనుగుణంగా మార్చే క్రమంలో రిజర్వ్ బ్యాంక్ ఆఫ్ ఇండియా (RBI) కీలక అడుగు వేసింది. ముఖ్యంగా ₹25,000 కోట్ల కంటే ఎక్కువ డెరివేటివ్స్ పోర్ట్‌ఫోలియో ఉన్న బ్యాంకులు ఇకపై కఠినమైన 'Standardised Approach for Counterparty Credit Risk' (SA-CCR) నిబంధనలను పాటించాల్సి ఉంటుంది.
గ్లోబల్ బ్యాంకులపై ప్రత్యేక దృష్టి
భారతదేశంలో కార్యకలాపాలు సాగిస్తున్న గ్లోబల్ సిస్టమిక్ ఇంపార్టెంట్ బ్యాంక్స్ (G-SIBs) కనీసం 3.5% లెవరేజ్ రేషియోను తప్పనిసరిగా నిర్వహించాలని RBI స్పష్టం చేసింది. ఈ విషయంలో బ్యాంకులు కోరిన మినహాయింపులను ఆర్బీఐ తిరస్కరించింది. ముఖ్యంగా, తాము పొందిన కొలేటరల్ (Collateral) ను చూపించి లెవరేజ్ ఎక్స్‌పోజర్‌ను తగ్గించుకునే వీలు లేదని స్పష్టం చేయడంతో, బ్యాంకుల మూలధన బలం మరింత పటిష్టంగా ఉండనుంది.
ఇన్వెస్టర్లపై ప్రభావం
ఈ మార్పు వల్ల బ్యాంకుల క్యాపిటల్ అడిక్వసీ (Capital Adequacy) పై ఒత్తిడి పెరిగే అవకాశం ఉంది. డెరివేటివ్స్ బుక్ అధికంగా ఉన్న బ్యాంకులు ఎక్కువ క్యాపిటల్ రిజర్వ్స్ ఉంచుకోవాల్సి రావడం వల్ల, వాటి ప్రాఫిట్ మార్జిన్స్‌పై స్వల్ప ప్రభావం పడవచ్చు. అయినప్పటికీ, భారతీయ బ్యాంకింగ్ రంగం గత కొన్ని ఏళ్లుగా బలమైన ఆర్థిక స్థితిలో ఉండటంతో, దీని ప్రభావం పెద్ద బ్యాంకులకే పరిమితం కానుంది. ప్రతి క్వార్టర్ చివరిలో డేటాను సెంట్రలైజ్డ్ ఇన్ఫర్మేషన్ మేనేజ్‌మెంట్ సిస్టమ్ ద్వారా రిపోర్ట్ చేయాల్సి ఉండటంతో పారదర్శకత కూడా పెరుగుతుందని నిపుణులు భావిస్తున్నారు.