చాలా లైఫ్ ఇన్సూరెన్స్ కంపెనీలు ఇప్పుడు 'ఇన్స్టెంట్ క్లెయిమ్ పేఅవుట్' ఫెసిలిటీని ఆఫర్ చేస్తున్నాయి. ఇది తక్షణమే నగదును ఇస్తుందని అనిపించినా, ఇది ఫైనల్ సెటిల్మెంట్ కాదు. క్లెయిమ్ రిజెక్ట్ అయితే, ఆ డబ్బును తిరిగి చెల్లించాల్సిన పరిస్థితి రావొచ్చు.
ప్రస్తుతం మార్కెట్లో చాలా లైఫ్ ఇన్సూరెన్స్ కంపెనీలు తమ పాలసీదారులకు 24 నుండి 48 గంటల్లో డబ్బు అందుతుందని హామీ ఇస్తున్నాయి. అంత్యక్రియలు లేదా అత్యవసర ఖర్చుల కోసం ఈ నగదు ఉపయోగపడుతుందని చెప్పినా, ఇది ఒక 'అడ్వాన్స్' మాత్రమే తప్ప ఫైనల్ క్లెయిమ్ అప్రూవల్ కాదని గుర్తుంచుకోవాలి.
అసలు ఇక్కడ ఉన్న రిస్క్ ఏంటి?
ఈ అడ్వాన్స్ తీసుకున్నంత మాత్రాన మీ క్లెయిమ్ ఖరారైనట్లు కాదు. ఇన్సూరెన్స్ కంపెనీ చట్ట ప్రకారం డెత్ క్లెయిమ్ను విచారిస్తుంది. ముఖ్యంగా పాలసీ తీసుకున్న మొదటి 3 ఏళ్లలో జరిగే మరణాలకు సంబంధించి, మీరు ఆరోగ్య వివరాలను దాచారా లేదా అన్నది ఇన్సూరెన్స్ సంస్థలు క్షుణ్ణంగా తనిఖీ చేస్తాయి. ఒకవేళ డాక్యుమెంట్లలో తేడాలున్నా లేదా సరైన సమాచారం ఇవ్వకపోయినా, కంపెనీ క్లెయిమ్ను రిజెక్ట్ చేసే హక్కును కలిగి ఉంటుంది.
డబ్బులు తిరిగి కట్టాల్సి వస్తే?
క్లెయిమ్ రిజెక్ట్ అయితే, మీరు తీసుకున్న ఆ అడ్వాన్స్ అమౌంట్ను తిరిగి కంపెనీకి చెల్లించాల్సి ఉంటుంది. ఆ సమయం కుటుంబ సభ్యులకు ఎంతో బాధాకరమైనది, అటువంటి సమయంలో ఇలాంటి ఆర్థిక భారం కుటుంబంపై తీవ్ర ప్రభావం చూపుతుంది.
నిబంధనలు గమనించండి:
- వెయిటింగ్ పీరియడ్: చాలా ప్లాన్లలో 1 నుండి 3 ఏళ్ల వెయిటింగ్ పీరియడ్ ఉంటుంది.
- డాక్యుమెంటేషన్: డెత్ సర్టిఫికెట్, మెడికల్ రిపోర్ట్స్ సబ్మిట్ చేసిన తర్వాతే ఈ ప్రాసెస్ మొదలవుతుంది.
- లిక్విడిటీ: కేవలం ఇన్సూరెన్స్ పేమెంట్ మీద ఆధారపడకుండా, కుటుంబ అవసరాల కోసం పక్కాగా ఒక 'ఎమర్జెన్సీ ఫండ్'ను మెయింటెన్ చేయడం ఉత్తమం.