Hyderabad ITAT కీలక తీర్పు ఇచ్చింది. పన్ను ఎగవేసేందుకు భార్య తన క్యాపిటల్ గెయిన్స్ లయబిలిటీని భర్తపైకి నెట్టేందుకు చేసిన ప్రయత్నాన్ని ట్రిబ్యునల్ తిరస్కరించింది. పన్ను ఆదా కోసం చేసే ఆలస్యపు 'ట్రిక్స్' ఇక చెల్లవని హెచ్చరించింది.
హైదరాబాద్‌లోని ఆదాయపు పన్ను అప్పిలేట్ ట్రిబ్యునల్ (ITAT) పన్ను చెల్లింపుదారులకు ఒక గట్టి హెచ్చరిక జారీ చేసింది. పన్ను దాడుల తర్వాత లేదా విచారణ మొదలయ్యాక, పన్ను బాధ్యతను భర్తకు బదిలీ చేస్తామంటే కుదరదని స్పష్టం చేసింది. ఆదాయపు పన్ను చట్టంలోని సెక్షన్ 99 (గతంలో సెక్షన్ 64(1)(iv)) ప్రకారం, బహుమతులుగా ఇచ్చిన ఆస్తుల ద్వారా వచ్చే ఆదాయాన్ని దాత (Donor) చేతిలో చూపించే అవకాశం ఉంటుంది. అయితే, దీన్ని దుర్వినియోగం చేయడంపై కోర్టు అభ్యంతరం వ్యక్తం చేసింది.
అసలేం జరిగింది?
ఒక మహిళా పన్ను చెల్లింపుదారుడు నిర్దిష్ట కాలానికి తన ఇన్కమ్ టాక్స్ రిటర్న్స్ దాఖలు చేయలేదు. ఆమె ఖాతాలో భారీగా ఫిక్స్‌డ్ డిపాజిట్లు ఉన్నట్లు గుర్తించిన అధికారులు విచారణ ప్రారంభించగా, ఆమె ఒక ఏడాది పాటు స్పందించలేదు. చివరకు, భర్త పన్ను అంచనాలను తిరిగి తెరిచేందుకు ఉన్న చట్టపరమైన గడువు (Time Limit) ముగిసిపోయిన తర్వాత, ఆ డబ్బు తన భర్త గిఫ్ట్ ఇచ్చిన ఆస్తి నుండి వచ్చిందని ఆమె క్లెయిమ్ చేసింది.
ITAT ఆగ్రహం
ఈ టైమింగ్ యాదృచ్ఛికం కాదని, కావాలనే పన్ను ఎగవేసేందుకు చేసిన ప్రయత్నమని ట్రిబ్యునల్ భావించింది. భర్తపై విచారణ చేసే అవకాశం అధికారులకు లేని సమయంలో ఈ క్లెయిమ్ చేయడం 'బ్యాడ్ ఫెయిత్' కిందకు వస్తుందని తేల్చిచెప్పింది. ఫలితంగా, ఆమె ఆ పన్ను బాధ్యత నుండి తప్పించుకోలేకపోయింది.
పన్ను చెల్లింపుదారులకు పాఠం
ఇప్పుడు AIS (Annual Information Statement) మరియు TIS (Taxpayer Information Summary) ద్వారా ప్రతి లావాదేవీ పారదర్శకంగా కనిపిస్తోంది. కాబట్టి పన్ను నోటీసులు వచ్చే వరకు వేచి చూసి, ఆ తర్వాత ట్యాక్స్ ప్లానింగ్ చేయడం ప్రమాదకరం. చట్టపరమైన గడువు దాటిన తర్వాత పన్ను బాధ్యతలను మార్చాలని చూస్తే, ఆదాయం తక్కువగా చూపినట్లు భావించి సెక్షన్ 270A కింద 50% నుండి 200% వరకు పెనాల్టీలు విధించే అవకాశం ఉంది.