ఇండియన్ గవర్నమెంట్ సెక్యూరిటీలలో (G-Secs) పెట్టుబడి పెట్టే విదేశీ ఇన్వెస్టర్లు, FPIలు మరియు FIIలు ఇకపై ట్యాక్స్ మినహాయింపు కోసం 'Form 173A' సమర్పించడం తప్పనిసరి. అక్టోబర్ 19, 2026 నుంచి ఈ నిబంధన అమల్లోకి వస్తుంది.
కొత్త నిబంధన ఏంటి?
సెంట్రల్ బోర్డ్ ఆఫ్ డైరెక్ట్ టాక్సెస్ (CBDT), విదేశీ పెట్టుబడిదారుల కోసం ఒక కొత్త రిపోర్టింగ్ విధానాన్ని తీసుకువచ్చింది. ఇకపై ఫారిన్ పోర్ట్‌ఫోలియో ఇన్వెస్టర్లు (FPIs), ఫారిన్ ఇన్‌స్టిట్యూషనల్ ఇన్వెస్టర్లు (FIIs) మరియు బ్యాంక్ ఫర్ ఇంటర్నేషనల్ సెటిల్‌మెంట్స్ (BIS) ఆదాయపు పన్ను చట్టంలోని షెడ్యూల్ IV కింద మినహాయింపులు పొందాలంటే Form 173Aని ఫైల్ చేయాల్సి ఉంటుంది. 2026 అక్టోబర్ 19 నుంచి ఈ నిబంధనలు అమలులోకి రానున్నాయి.
ఫారమ్‌లో ఏముంటుంది?
ఈ కొత్త ఫారమ్ రెండు ముఖ్యమైన భాగాలుగా విభజించబడింది:
- మొదటి భాగం: ఇన్వెస్టర్ నివాసం ఉన్న దేశం, పాన్ (PAN), టాక్స్ ఐడెంటిఫికేషన్ నంబర్ (TIN) మరియు సెబీ (SEBI) రిజిస్ట్రేషన్ వివరాలు.
- రెండవ భాగం: గవర్నమెంట్ సెక్యూరిటీల లావాదేవీలు, వడ్డీ వివరాలు మరియు క్యాపిటల్ గెయిన్స్ కి సంబంధించిన పూర్తి సమాచారం.
ప్రతి ఇన్వెస్టర్ తన ఆఫీసర్ ద్వారా ఈ వివరాలు అన్నీ నిజమైనవేనని డిక్లరేషన్ ఇవ్వడం ఇప్పుడు అనివార్యం.
ఇన్వెస్టర్లకు ఎదురయ్యే రిస్క్
ఈ నిబంధన వల్ల పన్ను రేట్లు మారనప్పటికీ, అడ్మినిస్ట్రేటివ్ భారం పెరుగుతుంది. ఒకవేళ డాక్యుమెంటేషన్‌లో చిన్న తప్పులు దొర్లినా లేదా సమాచారం అసంపూర్ణంగా ఉన్నా, ట్యాక్స్ బెనిఫిట్స్ రద్దు చేసే అవకాశం ఉందని అధికారులు హెచ్చరిస్తున్నారు. అంతేకాకుండా, దీనివల్ల అదనపు వడ్డీ భారం పడే ప్రమాదం కూడా ఉంది.
ఇండియన్ డెట్ మార్కెట్లోకి విదేశీ పెట్టుబడులు పెంచుకోవడానికి ప్రభుత్వం ప్రయత్నిస్తుండగా, ఈ తరహా నిబంధనలు పారదర్శకతను పెంచేందుకు దోహదపడతాయని మార్కెట్ నిపుణులు భావిస్తున్నారు.