దేశీయంగా నాచురల్ రబ్బర్ ధరలు కిలోకు **₹300** రికార్డ్ స్థాయికి చేరడంతో టైర్ తయారీ కంపెనీలు బెంబేలెత్తిపోతున్నాయి. గతేడాది కంటే ధరలు ఏకంగా **62%** పెరగడంతో, JK Tyre మరియు CEAT వంటి సంస్థల ప్రాఫిట్ మార్జిన్లపై తీవ్ర ప్రభావం పడుతోంది. ఈ క్రమంలో, కేంద్ర వాణిజ్య మంత్రిత్వ శాఖను డ్యూటీ-ఫ్రీ రబ్బర్ దిగుమతులకు అనుమతించాలని కంపెనీలు కోరుతున్నాయి.
ఎందుకీ డిమాండ్?
Automotive Tyre Manufacturers’ Association (ATMA) ఆధ్వర్యంలో టైర్ పరిశ్రమ ప్రతినిధులు కేంద్ర ప్రభుత్వానికి లేఖ రాశారు. రబ్బర్ ధరలు గత నవంబర్ తో పోలిస్తే 62% పెరగడం పరిశ్రమను ఆర్థికంగా కుంగదీస్తోంది. ప్రస్తుత గడ్డు పరిస్థితుల నుంచి గట్టెక్కేందుకు, పరిమిత కోటాలో సుంకం లేని (Duty-Free) దిగుమతులకు అనుమతి ఇవ్వాలని వారు కోరుతున్నారు.
మార్జిన్లపై తీవ్ర ప్రభావం
ఈ ముడి సరుకు ధరల భారాన్ని కస్టమర్లపైకి పూర్తిగా నెట్టడం కంపెనీలకు సాధ్యం కావడం లేదు. మార్కెట్ పోటీ దృష్ట్యా ధరలు పెంచలేని స్థితిలో, కంపెనీలు సొంత జేబు నుంచే ఖర్చు భరించాల్సి వస్తోంది. గత త్రైమాసికంలో ఇన్‌పుట్ ఖర్చులు 35–40% పెరగడం వల్ల, కంపెనీల ప్రాఫిట్ మార్జిన్లు భారీగా తగ్గాయి.
సప్లైలో భారీ గ్యాప్
దేశీయంగా రబ్బర్ ఉత్పత్తి తక్కువగా ఉండటం అసలు సమస్యగా మారింది. FY26 లో దేశీయ ఉత్పత్తి 9.05 లక్షల టన్నులు ఉండగా, పరిశ్రమ డిమాండ్ 14.27 లక్షల టన్నులుగా ఉంది. అంటే 37% సప్లై కొరత ఉండటంతో కంపెనీలు దిగుమతులపైనే ఆధారపడాల్సి వస్తోంది. ప్రస్తుతం అంతర్జాతీయ మార్కెట్‌లోనూ ధరలు అధికంగా ఉండటం, దానికి తోడు దిగుమతి సుంకాలు తోడవ్వడంతో ఖర్చులు తడిసి మోపెడవుతున్నాయి.
ఎకనామిక్ హెడ్‌విండ్స్
కేవలం నాచురల్ రబ్బరే కాకుండా, సింథటిక్ రబ్బర్, కార్బన్ బ్లాక్ వంటి ఇతర ముడి సరుకుల ధరలు కూడా పైకి వెళ్తున్నాయి. పశ్చిమాసియాలో ఉద్రిక్తతల వల్ల క్రూడాయిల్ ధరలు, లాజిస్టిక్స్ ఖర్చులు కూడా పెరగడం టైర్ తయారీదారులకు పెద్ద సవాలుగా మారింది. ఎగుమతులు 16% పెరిగినప్పటికీ, ముడి సరుకు ధరలు ఇలాగే కొనసాగితే ఎగుమతి సామర్థ్యం దెబ్బతినే ప్రమాదం ఉందని విశ్లేషకులు హెచ్చరిస్తున్నారు.