భారత మార్కెట్లో Rolls-Royce వరుసగా నాలుగో ఏడాది డబుల్ డిజిట్ గ్రోత్‌ను నమోదు చేసింది. ముఖ్యంగా యువ పారిశ్రామికవేత్తలు, ఎలక్ట్రిక్ మోడల్ 'Spectre' పట్ల చూపిస్తున్న ఆసక్తి ఈ వృద్ధికి ప్రధాన కారణమని కంపెనీ వెల్లడించింది.
భారత లగ్జరీ ఆటోమొబైల్ రంగంలో Rolls-Royce సరికొత్త అధ్యాయాన్ని లిఖిస్తోంది. గత నాలుగు ఏళ్లుగా కంపెనీ స్థిరంగా డబుల్ డిజిట్ వృద్ధిని సాధిస్తోంది. గతంలో సంపన్న వర్గాలకే పరిమితమైన ఈ లగ్జరీ బ్రాండ్, ఇప్పుడు యువ పారిశ్రామికవేత్తలను ఆకర్షించడంలో విజయం సాధించింది. గ్లోబల్ మార్కెట్లో కూడా సగటు కొనుగోలుదారుడి వయస్సు 40 ఏళ్ల లోపుకు పడిపోవడం గమనార్హం.
కస్టమైజేషన్ తోనే మ్యాజిక్
కంపెనీ అమ్మకాల కంటే కస్టమర్ల అభిరుచులకు అనుగుణంగా తయారు చేసే 'Bespoke' కార్లపైనే ఎక్కువ దృష్టి పెడుతోంది. తమ కారును ప్రత్యేకంగా కనిపించేలా చేసుకునేందుకు కొనుగోలుదారులు ఇష్టపడుతున్నారు. దీనికి తోడు ఎలక్ట్రిక్ మోడల్ Spectre మార్కెట్‌లోకి రావడం విక్రయాలకు ఊపునిచ్చింది. ఈ కారులోని నిశ్శబ్దం, పవర్‌ఫుల్ టార్క్ నేటి తరం ధనికులను ఆకట్టుకుంటోంది.
ఎక్స్‌క్లూజివ్ ప్లానింగ్
ఆసియా-పసిఫిక్ రీజియన్‌లో ఇండియా అత్యంత వేగంగా వృద్ధి చెందుతున్న మార్కెట్‌గా నిలిచింది. Rolls-Royce కార్ల ప్రారంభ ధర ₹7 కోట్ల నుంచి మొదలవుతుంది. ఇక కస్టమైజేషన్ బట్టి ఈ ధర భారీగా పెరుగుతుంది. తయారీ అంతా యూకేలో జరుగుతుండటంతో, ఆర్డర్ ఇచ్చిన తర్వాత కారు డెలివరీ కావడానికి కనీసం 14 నెలలు పడుతుంది. కొన్ని ప్రత్యేక ఆర్డర్ల కోసం అయితే 3 ఏళ్ల సమయం కూడా పట్టవచ్చు.
ప్రస్తుతం ఢిల్లీ, చెన్నైలలో రిటైల్ హబ్స్ ఉండగా, ముంబై, హైదరాబాద్‌లలో టెక్నికల్ సపోర్ట్ కేంద్రాలు ఉన్నాయి. భారీ దిగుమతి సుంకాలు ఉన్నప్పటికీ, ఈ సంస్థ తన ఎక్స్‌క్లూజివ్ స్ట్రాటజీతో అగ్రస్థానంలో కొనసాగుతోంది.