Draft Seeds Bill, 2025 పై కేంద్రం మరోసారి చర్చలు మొదలుపెట్టింది. సుమారు 18,000 సూచనలు రావడంతో కేంద్ర వ్యవసాయ శాఖ మంత్రి Shivraj Singh Chouhan రైతు సంఘాలతో సమావేశమయ్యారు. 1966 నాటి పాత చట్టానికి కాలం చెల్లిన వేళ, ఈ కొత్త చట్టం వల్ల ఇన్వెస్టర్లపై పడే ప్రభావం ఏంటో చూడాలి.
1966 చట్టానికి స్వస్తి.. నయా చట్టం దిశగా అడుగులు
పాతబడిన Seeds Act, 1966 మరియు Seeds (Control) Order, 1983 స్థానంలో కొత్త చట్టాన్ని తీసుకురావాలని ప్రభుత్వం భావిస్తోంది. ఇందులో భాగంగా అన్ని రకాల విత్తనాల రిజిస్ట్రేషన్ తప్పనిసరి చేయడంతో పాటు, SATHI పోర్టల్ ద్వారా డిజిటల్ ట్రేసిబిలిటీని అమలు చేయనున్నారు. నాణ్యమైన విత్తనాలను రైతులకు అందించడమే దీని ప్రధాన లక్ష్యం.
కంపెనీలకు పెరగనున్న కంప్లయన్స్ భారం
ఈ బిల్లులో నిబంధనలు పాటించని వారికి భారీ జరిమానాలు ప్రతిపాదించారు. కల్తీ విత్తనాలను పంపిణీ చేస్తే ₹30 లక్షల వరకు ఫైన్, జైలు శిక్ష పడే అవకాశం ఉంది. ఇది అసంఘటిత రంగంలోని నకిలీ విత్తన విక్రేతలను కట్టడి చేయడమే కాకుండా, మార్కెట్లో నాణ్యమైన విత్తనాల సరఫరాకు దోహదపడుతుంది. అయితే, పెద్ద సీడ్ కంపెనీలకు కంప్లయన్స్ ఖర్చులు మరింత పెరిగే అవకాశం ఉంది.
ఎక్కడ చిక్కుముడి పడింది?
ప్రభుత్వం పార్లమెంటులో ఈ బిల్లును ఎప్పుడు ప్రవేశపెడుతుందనే దానిపై క్లారిటీ లేకపోవడంతో మార్కెట్లో కొంత అనిశ్చితి నెలకొంది. ముఖ్యంగా GM (Genetically Modified) విత్తనాల విషయంలో రైతు సంఘాలు, సైంటిస్టుల మధ్య అభిప్రాయభేదాలు ఉన్నాయి. కార్పొరేట్ ప్రయోజనాల కోసమే ఈ నిబంధనలనే ఆరోపణలు కొందరివి కాగా.. ఉత్పాదకత పెరగాలంటే అత్యాధునిక సాంకేతికత తప్పనిసరి అని పరిశ్రమ వర్గాలు వాదిస్తున్నాయి.
ఇన్వెస్టర్లు గమనించాల్సిన అంశాలు
విత్తనాలు విఫలమైతే రైతులకు పరిహారం చెల్లించే విషయంలో ఇంకా స్పష్టత లేదు. వినియోగదారుల ఫోరమ్లను ఆశ్రయించాల్సిందేనని ప్రభుత్వం సంకేతాలు ఇస్తోంది. అలాగే, విత్తనాల ధరలను మార్కెట్ శక్తులకే వదిలేయాలన్న ప్రభుత్వ నిర్ణయం సీడ్ తయారీ సంస్థల ఆదాయ నమూనాలపై ప్రభావం చూపవచ్చు. కాబట్టి, పార్లమెంటు సమావేశాల్లో బిల్లుకు సంబంధించి వచ్చే తాజా పరిణామాలను ఇన్వెస్టర్లు నిశితంగా గమనించాలి.