Xi Jinping அதிரடி: ஒரே நேரத்தில் 33 அதிகாரிகள் நீக்கம் - சீன அரசியலில் பெரும் பரபரப்பு

சீன அதிபர் Xi Jinping தனது அதிகாரத்தை மேலும் உறுதிப்படுத்தும் வகையில் 33 உயர்மட்ட அதிகாரிகளை பதவியில் இருந்து நீக்கியுள்ளார். இந்த நடவடிக்கை கட்சி மாநாட்டில் உறுதிப்படுத்தப்பட்டதையடுத்து, சீனாவின் மிக உயர்ந்த ராணுவ அமைப்பான Central Military Commission-ல் தற்போது அதிபர் Xi மற்றும் ஜெனரல் Zhang Shengmin ஆகிய இருவர் மட்டுமே முக்கிய பொறுப்புகளில் உள்ளனர்.

முதலீட்டாளர்களுக்கு ஏன் கவலை?

பொதுவாக சீனா எடுக்கும் பொருளாதார சீர்திருத்தங்கள் மற்றும் சலுகை அறிவிப்புகளை எதிர்பார்த்து காத்திருக்கும் உலக முதலீட்டாளர்களுக்கு, தற்போதைய சூழல் ஒரு பின்னடைவாக பார்க்கப்படுகிறது. நாட்டின் பொருளாதாரம் மந்தமாக இருக்கும் இந்த சூழலில், அரசு பொருளாதார வளர்ச்சியை விட கட்சி ஒழுக்கத்திற்கும் அரசியல் உறுதிப்பாட்டிற்கும் முன்னுரிமை அளித்துள்ளது. இதனால், எதிர்காலத்தில் நிதி சார்ந்த முடிவுகள் எடுக்கப்படுவதில் காலதாமதம் ஏற்படலாம் என அஞ்சப்படுகிறது.

மாநாட்டில் குறைந்த வருகை

இந்த கூட்டத்தில் கலந்து கொண்டவர்களின் எண்ணிக்கை கடந்த 14 ஆண்டுகளில் இல்லாத அளவுக்கு மிகக்குறைவாக இருந்தது. மொத்தம் உள்ள 205 மத்திய கமிட்டி உறுப்பினர்களில் 162 பேர் மட்டுமே பங்கேற்றுள்ளனர். Liu Jianchao போன்ற முக்கிய பிரமுகர்கள் மீதான விசாரணை, இந்த அதிரடி நீக்கம் ராணுவம் மட்டுமல்லாது சர்வதேச விவகாரங்களை கையாளும் துறைகளையும் பாதித்துள்ளதை காட்டுகிறது.

சரித்திரம் காணாத மாற்றம்

தற்போதைய ஆட்சிக்காலத்தில் மட்டும் சுமார் 51 மத்திய கமிட்டி உறுப்பினர்கள் நீக்கப்பட்டுள்ளனர். இந்த அளவு அதிகப்படியான மாற்றங்கள், சீனாவில் தொழில் புரியும் சர்வதேச நிறுவனங்களுக்கு நீண்டகால திட்டங்களை செயல்படுத்துவதில் பெரும் குழப்பத்தை ஏற்படுத்தியுள்ளது. 2027-ம் ஆண்டு நடக்கவுள்ள Communist Party Congress-க்கு முன்னதாக, சீனா மீண்டும் பொருளாதார வளர்ச்சியை நோக்கிய பாதையில் திரும்புமா அல்லது அரசியல் கட்டுப்பாடு தொடருமா என்பதுதான் முதலீட்டாளர்களின் தற்போதைய பெரிய கேள்வி.