அமெரிக்காவின் உயரிய நீதிமன்றமான US Supreme Court, புலம்பெயர்ந்தோரை அவர்களின் சொந்த நாடு அல்லாத மூன்றாம் நாடுகளுக்கு நாடு கடத்தும் நடவடிக்கையை தற்காலிகமாக தொடர அனுமதி அளித்துள்ளது.
அமெரிக்காவின் உச்ச நீதிமன்றம் செவ்வாயன்று ஒரு முக்கியமான இடைக்கால உத்தரவை பிறப்பித்துள்ளது. இதன்படி, புலம்பெயர்ந்தோரை அவர்களின் தாய்நாடுகளுக்கு பதிலாக, பிற நாடுகளுக்கு நாடு கடத்தும் அரசின் நடவடிக்கையை அரசு தொடரலாம். கீழ் நீதிமன்றம் இந்த நடைமுறைக்கு தடை விதித்திருந்த நிலையில், உச்ச நீதிமன்றம் அதற்கு தற்காலிக முட்டுக்கட்டை போட்டுள்ளது.
அரசின் வாதம் என்ன?
சொந்த நாடுகள் தங்கள் குடிமக்களை திரும்பப் பெற மறுக்கும் சூழலில், எல்லை நிர்வாகத்தை சீராக வைத்திருக்க இந்த முறை அவசியம் என அரசு தரப்பு வாதிடுகிறது. கீழ் நீதிமன்றத்தின் தடையால் லைபீரியா மற்றும் கயானா போன்ற நாடுகளுக்கான விமான சேவைகள் முடங்கியிருந்தன. இந்த நாடுகளுடனான ஒப்பந்தங்கள் தான் தற்போது அரசின் இமிகிரேஷன் கொள்கையின் முக்கிய அஸ்திவாரமாக உள்ளது.
எழுந்திருக்கும் சர்ச்சைகள்
இந்த விவகாரத்தில் கடுமையான விமர்சனங்களும் எழுந்துள்ளன. போதிய கண்காணிப்பு இல்லாததால், பாதிக்கப்பட்டவர்கள் வெளிநாடுகளில் அநியாயமாக சிறையிலடைக்கப்படலாம் அல்லது ஆபத்தான சூழலுக்கு தள்ளப்படலாம் என்று வழக்கறிஞர்கள் எச்சரிக்கின்றனர். குறிப்பாக, எந்த குற்றப் பின்னணியும் இல்லாதவர்கள், தங்கள் உயிருக்கு அச்சுறுத்தல் இருப்பதாக கூறி புகலிடம் கோரியவர்களும் இதில் அடங்குவர்.
இந்த சட்டப்போராட்டத்தின் மையப்புள்ளி இதுதான்: புலம்பெயர்ந்தோர் நாடு கடத்தப்படுவதற்கு முன்னால், அந்த முடிவை எதிர்த்து வாதிட அவர்களுக்கு முறையான வாய்ப்பு வழங்கப்பட வேண்டுமா? என்பதுதான். நீதிமன்றம் இறுதித் தீர்ப்பை வழங்கும் வரை, அரசின் இந்த அதிரடி நடவடிக்கை தொடரும் என்பது குறிப்பிடத்தக்கது.