மேற்குக் கரையில் (West Bank) பணியாற்றும் Dutch நாட்டு தூதரக அதிகாரிகளின் டிப்ளோமேட்டிக் அந்தஸ்தை இஸ்ரேல் அதிரடியாக ரத்து செய்துள்ளது. இஸ்ரேல் குடியிருப்புகளில் உற்பத்தியாகும் பொருட்களுக்கு நெதர்லாந்து தடை விதித்ததே இந்த மோதலுக்கு முக்கிய காரணம்.
இஸ்ரேல் வெளியுறவுத்துறை அமைச்சர் கிடியோன் சார் (Gideon Saar) இந்த அறிவிப்பை வெளியிட்டுள்ளார். இதன்படி, மேற்குக் கரையில் பணியாற்றும் நெதர்லாந்து நாட்டு தூதரக அதிகாரிகள், தங்களுக்கு வழங்கப்பட்ட அதிகாரப்பூர்வ உரிமைகளை 1 வாரத்திற்குள் ஒப்படைக்க வேண்டும் என்று உத்தரவிடப்பட்டுள்ளது. கெடு முடிந்த பிறகு, வியன்னா உடன்படிக்கையின் கீழ் அவர்களுக்கு வழங்கப்பட்ட தூதரக சலுகைகள் மற்றும் பாதுகாப்புகள் பறிக்கப்படும்.
வர்த்தகப் போர் பின்னணி
இஸ்ரேல் குடியிருப்புகளில் இருந்து வரும் பொருட்களுக்கு நெதர்லாந்து அரசு தடை விதித்துள்ளது. இது போன்ற நடவடிக்கைகளை பிரான்ஸ், ஸ்பெயின் மற்றும் அயர்லாந்து போன்ற நாடுகளும் ஏற்கனவே மேற்கொண்டுள்ளன. ஐரோப்பிய நாடுகள் ஒன்றிணைந்து இந்தத் தடைகளை விதிப்பது, அந்த பிராந்தியத்தில் இஸ்ரேலின் வர்த்தகக் கொள்கைகளுக்கு பெரும் சவாலாக மாறியுள்ளது.
தொடரும் பதற்றம்
ஏற்கனவே இதே காரணத்திற்காக கிழக்கு ஜெருசலேமில் உள்ள பிரிட்டிஷ் தூதரகத்தை மூட இஸ்ரேல் உத்தரவிட்டது. கடந்த ஆகஸ்ட் மாதம் காசாவில் நெதர்லாந்து நாட்டின் செயல்பாடுகளுக்கு இஸ்ரேல் கட்டுப்பாடுகளை விதித்திருந்தது. தற்போதுள்ள இந்த சூழல், இஸ்ரேல் மற்றும் ஐரோப்பிய நாடுகளுக்கு இடையிலான வர்த்தகப் பாதைகள் மற்றும் விநியோகச் சங்கிலியில் (Supply Chain) பெரும் நிச்சயமற்ற தன்மையை உருவாக்கியுள்ளது.
அடுத்த 1 வாரத்திற்குள் நெதர்லாந்து அரசு இந்த உத்தரவுக்கு எவ்வாறு பதிலளிக்கப் போகிறது மற்றும் பிற ஐரோப்பிய நாடுகள் இதற்கு என்ன எதிர்வினை ஆற்றப் போகின்றன என்பதே சர்வதேச முதலீட்டாளர்களின் கவனத்தை ஈர்த்துள்ளது.