ஜெர்மனியின் BND உளவு அமைப்பை 1998 முதல் 2005 வரை வழிநடத்திய August Hanning, தேசத்துரோக உளவு குற்றச்சாட்டின் கீழ் கைது செய்யப்பட்டுள்ளார். இவர் சுமார் 2,000 ரகசிய ஆவணங்களைத் திருடியதாக அதிகாரிகள் குற்றம் சாட்டியுள்ளனர்.
ஜெர்மனியின் முக்கிய வெளிநாட்டு உளவு அமைப்பான BND-ன் முன்னாள் தலைவரான 80 வயதுடைய August Hanning, அக்டோபர் 6, 2026 அன்று Bad Tölz-Wolfratshausen பகுதியில் வைத்து கைது செய்யப்பட்டார். நீண்ட காலமாக நடைபெற்று வந்த விசாரணைக்கு பிறகு இந்த அதிரடி நடவடிக்கை எடுக்கப்பட்டுள்ளது.
சுமத்தப்பட்டுள்ள குற்றச்சாட்டுகள்
அவர் மீது தேசத்துரோக உளவு, அரசு ரகசியங்களை சட்டவிரோதமாகக் கையாளுதல் மற்றும் தேசத்துரோக முயற்சி ஆகிய கடுமையான பிரிவுகளின் கீழ் வழக்குப்பதிவு செய்யப்பட்டுள்ளது. இவருடன், BND-ன் முன்னாள் தலைமை அதிகாரி 'Manfred D.' என்பவரும் கைது செய்யப்பட்டுள்ளார். இவர் 2026-ம் ஆண்டின் தொடக்கம் வரை ஏஜென்சி நெட்வொர்க்குகளை அணுகும் அதிகாரத்தைக் கொண்டிருந்தார் என்பது குறிப்பிடத்தக்கது.
என்ன நடந்தது?
சுமார் 2010-ம் ஆண்டு முதல் இவர்களுக்கு இடையே சட்டவிரோத கூட்டணி இருந்ததாக விசாரணையில் தெரியவந்துள்ளது. இதன் மூலம் சுமார் 2,000 ரகசிய ஆவணங்கள் கசிந்துள்ளன. இந்த ஆவணங்களை Hanning தனது சொந்த ஆலோசனை நிறுவனங்களின் அறிக்கைகளைத் தயாரிக்க பயன்படுத்தியுள்ளார். மேலும், ஒருமுறை வெளிநாட்டு உளவுத்துறை அதிகாரிக்காக ரகசியத் தகவல்களை வைத்து ஆய்வு அறிக்கை தயாரித்துக் கொடுத்ததாகவும் குற்றம் சாட்டப்பட்டுள்ளது.
ஜெர்மனியின் வரலாற்றில் இது மிக முக்கியமான பாதுகாப்பு மீறலாகக் கருதப்படுகிறது. கசிந்த ஆவணங்களில் பெரும்பாலானவை உயர்மட்ட அதிகாரிகளுக்கான பிரத்யேகத் தகவல்கள் என்பதால், இது அந்நாட்டின் தேசிய பாதுகாப்பிற்கு மிகப்பெரிய அச்சுறுத்தலாகப் பார்க்கப்படுகிறது. தற்போது, இந்தத் தகவல்கள் எந்தெந்த வெளிநாடுகளுக்குச் சென்றடைந்தன என்பது குறித்து அதிகாரிகள் தீவிர விசாரணை நடத்தி வருகின்றனர்.