MoRTH-ன் அதிரடி உத்தரவு: நெடுஞ்சாலை பணிகளில் தவறு செய்தால் இன்ஜினியர்களுக்கு அபராதம்!

சாலை போக்குவரத்து மற்றும் நெடுஞ்சாலை அமைச்சகம் (MoRTH) தேசிய நெடுஞ்சாலை திட்டங்களின் தரத்தை உயர்த்தும் நோக்கில், ஆலோசனை நிறுவனங்களுக்கான கண்காணிப்பை பலப்படுத்தியுள்ளது. புதிய வழிகாட்டுதலின்படி, திட்டப்பணிகளில் ஏதேனும் பெரிய தவறுகள் அல்லது கட்டுமான குறைபாடுகள் ஏற்பட்டால், அந்தத் திட்டத்தை மேற்பார்வை செய்யும் அதிகாரி அல்லது சுதந்திரமான இன்ஜினியர்களுக்கு (Independent Engineers) 20 பாயிண்ட் வரை குறைக்கப்படும்.

பொறுப்புடைமையை அதிகரிக்கும் நடவடிக்கை

நெடுஞ்சாலை திட்டங்களில் அரசின் கண்களாக செயல்படுவது இந்த ஆலோசனை நிறுவனங்கள் தான். டிசைன் ஆய்வு, தரக்கட்டுப்பாடு மற்றும் பாதுகாப்பு தரநிலைகளை உறுதி செய்வது இவர்களது முக்கிய பணி. ஏற்கனவே சாலை அமைக்கும் நிறுவனங்களுக்கு 30 பாயிண்ட் கழிக்கப்படும் நடைமுறை உள்ள நிலையில், தற்போது மேற்பார்வை செய்யும் பொறியாளர்களுக்கும் பொறுப்பு நிர்ணயிக்கப்பட்டுள்ளது. பாலம் இடிந்து விழுதல் போன்ற பெரிய பாதிப்புகளுக்கு இனி இவர்களும் நேரடிப் பொறுப்பாவார்கள்.

வணிக ரீதியான தாக்கம்

இந்த அபராத முறை முக்கிய நிறுவனங்களுக்கு மட்டுமின்றி, அவர்களுடன் இணைந்து பணியாற்றும் ஜாயிண்ட் வென்ச்சர் (JV) கூட்டாளிகளுக்கும் பொருந்தும். இந்த 20 பாயிண்ட் குறைப்பு, ஒரு நிறுவனத்தின் ஒட்டுமொத்த ஸ்கோரை நெகட்டிவ் நிலைக்கு தள்ளக்கூடும். இதன் மூலம், எதிர்காலத்தில் அரசு ஒப்பந்தங்களை பெறுவதில் அந்த நிறுவனங்கள் கடும் சிக்கலை சந்திக்க நேரிடும். NHAI உடனடியாக இந்த விதிமுறையை அமல்படுத்தியுள்ளது.

தரத்திற்கு முன்னுரிமை

கடந்த 2021 முதல் 2026 வரை நெடுஞ்சாலைகளில் 48 முறை கட்டமைப்பு குறைபாடுகள் கண்டறியப்பட்டதை அடுத்து, இந்த நடவடிக்கை எடுக்கப்பட்டுள்ளது. இனி வேகத்தை விட தரமே முக்கியம் என்பதில் மத்திய அரசு உறுதியாக உள்ளது. முதலீட்டாளர்கள் இனி தரம் குறையாத மற்றும் அபாயங்கள் இல்லாத நிறுவனங்களையே கவனத்தில் கொள்வது அவசியமாகும்.