துபாயில் இருந்து டெல் அவிவ் சென்ற Flydubai விமானத்தில், நடுவானில் பைலட்களுக்கு இடையே ஏற்பட்ட மோதலால் சவூதி அரேபியாவில் அவசரமாக தரையிறக்கப்பட்டது. காயம் அடைந்த போதிலும், முன்னாள் SpiceJet பைலட் ஸ்மித் மச்சார் விமானத்தை பத்திரமாக தரை இறக்கினார்.
துபாயில் இருந்து டெல் அவிவ் நோக்கி சென்ற FZ1073 Flydubai விமானத்தில், பயணம் தொடங்கி 2 மணி நேரத்திற்கு பிறகு காக்பிட் உள்ளே எதிர்பாராத மோதல் வெடித்தது. கேப்டன் ஸ்மித் மச்சார் மற்றும் துணை பைலட் இடையே ஏற்பட்ட இந்த மோதல் விமானப் பயணத்தில் பெரும் பரபரப்பை ஏற்படுத்தியது.
விமானத்தின் அதிரடி நடவடிக்கை
இந்தச் சூழலைச் சமாளிக்க Boeing 737 MAX 8 விமானம், 34,000 அடியில் இருந்து 16,000 அடிக்கு அதிரடியாக கீழே இறக்கப்பட்டது. பைலட்கள் அவசர கால குறியீடுகளான 7700 மற்றும் 7500-ஐ பயன்படுத்தினர். இதில் 7500 என்பது விமானத்திற்குள் அத்துமீறல் அல்லது பாதுகாப்பு அச்சுறுத்தல் இருப்பதைக் குறிப்பதாகும். இந்த சமிக்ஞையைத் தொடர்ந்து, அப்பகுதியில் போர் விமானங்கள் தயார் நிலையில் வைக்கப்பட்டன.
காயங்களுடன் பத்திரமாக தரை இறங்கிய கேப்டன்
இந்தியரான கேப்டன் ஸ்மித் மச்சார், மோதலின் போது காயமடைந்தார். இருப்பினும், சாமர்த்தியமாகச் செயல்பட்டு சவூதி அரேபியாவின் தபூக் விமான நிலையத்தில் விமானத்தை பத்திரமாக தரை இறக்கினார். விமானத்தில் இருந்த 174 பயணிகளும் பாதுகாப்பாக வெளியேற்றப்பட்டனர். தற்போது பைலட்கள் இருவரும் மருத்துவமனையில் அனுமதிக்கப்பட்டுள்ளனர்.
விசாரணை மற்றும் பாதுகாப்பு
சவூதி மற்றும் இஸ்ரேல் நாட்டு விமானப் போக்குவரத்து அதிகாரிகள் இந்த விவகாரம் குறித்து விசாரணை நடத்தி வருகின்றனர். சம்பந்தப்பட்ட விமானம் (A6-FKF) தபூக் விமான நிலையத்திலேயே தடுத்து நிறுத்தப்பட்டுள்ளது. இந்த சம்பவம் விமானப் போக்குவரத்தில் பைலட்களின் மனநலம், பாதுகாப்பு சோதனைகள் மற்றும் காக்பிட் பாதுகாப்பு விதிமுறைகள் குறித்து உலகளவில் மீண்டும் பல கேள்விகளை எழுப்பியுள்ளது.