Air India: நிதி ஆண்டில் நஷ்டம் இரட்டிப்பு! ₹22,238 கோடி இழப்பில் ஏர் இந்தியா

பெரும் சவாலில் ஏர் இந்தியா

கடந்த நிதி ஆண்டுடன் ஒப்பிடும்போது, ஏர் இந்தியாவின் நிகர நஷ்டம் ₹10,858 கோடியிலிருந்து தற்போது ₹22,238 கோடியாக இருமடங்காக அதிகரித்துள்ளது. நிறுவனத்தின் மொத்த வருமானம் 8.6% சரிந்து ₹71,869 கோடியாகக் குறைந்துள்ளது. அதே சமயம், செலவுகள் 4.9% அதிகரித்து ₹93,733 கோடியாக உயர்ந்துள்ளது, இது நிறுவனத்தின் நிதி நிலையை மேலும் பலவீனப்படுத்தியுள்ளது.

நஷ்டத்திற்கு முக்கிய காரணங்கள் என்ன?

நிறுவனத்தின் நஷ்டத்திற்கு மிக முக்கியக் காரணம் அந்நிய செலாவணி இழப்புதான். முந்தைய ஆண்டில் ₹1,545 கோடியாக இருந்த அந்நிய செலாவணி இழப்பு, இந்த முறை ₹7,388 கோடியாக அதிரடியாக உயர்ந்துள்ளது. விமான எரிபொருள் செலவு 7.4% குறைந்து ₹26,871 கோடியாக இருந்தாலும், பராமரிப்பு செலவுகள் 7.7% அதிகரித்து ₹14,976 கோடியாக உள்ளது.

விபத்து பாதிப்பு மற்றும் காப்பீடு

ஜூன் 2025-ல் நடந்த AI171 விபத்து தொடர்பான செலவுகள் ₹429 கோடியாக கணக்கிடப்பட்டுள்ளது. இருப்பினும், இந்த இழப்புகள் காப்பீடு மூலம் ஈடுசெய்யப்படும் என நிறுவனம் தெரிவித்துள்ளது.

முதலீட்டாளர்கள் கவனத்திற்கு

ஏர் இந்தியா பங்குச் சந்தையில் (NSE/BSE) பட்டியலிடப்பட்ட நிறுவனம் அல்ல. இது Tata Group மற்றும் Singapore Airlines ஆகியவற்றுக்குச் சொந்தமான தனியார் நிறுவனமாகும். டாடா சன்ஸ் தலைவர் என்.சந்திரசேகரன் கூறியபடி, இது ஒரு நீண்ட கால மறுசீரமைப்புப் பணி என்பதால், லாபத்தை நோக்கித் திரும்ப நிறுவனம் இன்னும் பல கட்டமைப்பு மாற்றங்களைச் செய்ய வேண்டியுள்ளது.