Telecom Regulatory Authority of India (TRAI) செப்டம்பர் 2026-க்கான புதிய விதிகளை அறிவித்துள்ளது. இனி டெலிகாம் நிறுவனங்கள் AI தொழில்நுட்பத்தைப் பயன்படுத்தி ஸ்பேம் கால்களை முன்கூட்டியே தடுக்க வேண்டும். பிசினஸ் நிறுவனங்கள் தங்கள் எண்களை முன்கூட்டியே பதிவு செய்வது கட்டாயமாக்கப்பட்டுள்ளது.
ஸ்பேம் கால்களைக் கட்டுப்படுத்த TRAI தனது வியூகத்தை மாற்றியுள்ளது. செப்டம்பர் 18, 2026 அன்று வெளியிடப்பட்ட புதிய விதிமுறைகளின்படி, டெலிகாம் ஆபரேட்டர்கள் AI மற்றும் மெஷின் லேர்னிங் தொழில்நுட்பத்தைப் பயன்படுத்தி ஸ்பேம் செய்பவர்களை முன்கூட்டியே கண்டறிந்து நடவடிக்கை எடுக்க வேண்டும். முன்பு போல நுகர்வோர் புகார் அளிக்கும் வரை காத்திருக்க வேண்டிய அவசியம் இனி இல்லை.
AI-ன் அதிரடி கண்காணிப்பு
புதிய விதிகளின்படி, ஒரே செண்டரிடம் இருந்து 10 நாட்களுக்குள் 5 அல்லது அதற்கு மேற்பட்ட எண்கள் ஸ்பேம் என AI-ஆல் அடையாளம் காணப்பட்டால், அந்த டெலிகாம் நிறுவனம் கடும் நடவடிக்கை எடுக்க வேண்டும். இதில் கே.ஒய்.சி (KYC) சரிபார்ப்பு முதல், 15 நாட்கள் அவுட்கோயிங் சேவையைத் தடுப்பது அல்லது நிரந்தரமாக இணைப்பைத் துண்டிப்பது வரை நடவடிக்கைகள் எடுக்கப்படும்.
வங்கிச் சேவைகளுக்குப் பாதுகாப்பு
அதே சமயம், வங்கி மற்றும் நிதிச் சேவை சார்ந்த முக்கிய எஸ்.எம்.எஸ் மற்றும் கால்கள் தடையின்றி செல்ல வேண்டும் என்பதற்காக TRAI சில கட்டுப்பாடுகளை விதித்துள்ளது. குறிப்பாக, 140xx, 1600xx, 1601xx ஆகிய தொடர்களில் வரும் எண்களை தேர்ட்-பார்ட்டி ஆப்ஸ்கள் ஸ்பேம் என மார்க் செய்யவோ அல்லது தடுக்கவோ கூடாது.
முக்கியமான பிசினஸ் தகவல்கள் வாடிக்கையாளர்களுக்குச் சென்றடைவதை உறுதி செய்ய, பிசினஸ் நிறுவனங்கள் தங்கள் எண்களை DLT (Distributed Ledger Technology) தளத்தில் முன்பதிவு செய்வது இனி கட்டாயமாகும்.
முதலீட்டாளர்கள் கவனத்திற்கு
இந்த புதிய மாற்றங்களால் டெலிகாம் நிறுவனங்களுக்கு நெட்வொர்க் உள்கட்டமைப்பு மற்றும் AI தொழில்நுட்பத்தை மேம்படுத்த கூடுதல் செலவுகள் ஏற்படும். மேலும், TRAI மற்றும் மின்னணு தகவல் தொழில்நுட்ப அமைச்சகம் இணைந்து, தேர்ட்-பார்ட்டி ஆப்ஸ்களை நேரடியாகக் கட்டுப்படுத்த திட்டமிட்டு வருகின்றன. இந்த மாற்றங்கள் டெலிகாம் நிறுவனங்களின் லாப வரம்பு மற்றும் செயல்பாட்டுச் செலவுகளில் எத்தகைய தாக்கத்தை ஏற்படுத்தும் என்பதை முதலீட்டாளர்கள் தொடர்ந்து கண்காணிக்க வேண்டும்.