இந்திய தொலைத்தொடர்பு ஒழுங்குமுறை ஆணையமான TRAI, அனைத்து டெலிகாம் நிறுவனங்களுக்கும் ஒரு முக்கியமான உத்தரவைப் பிறப்பித்துள்ளது. இனி டிஜிட்டல் ரீசார்ஜ் தளங்களில் 'TRAI-Mandated Packs' என்ற பிரிவை கட்டாயமாக்க வேண்டும். இது குறைந்த விலை வாய்ஸ் மற்றும் SMS பேக்குகளை முன்னிலைப்படுத்தும்.
புதிய விதிமுறை என்ன?
TRAI வெளியிட்டுள்ள புதிய Telecom Consumer Protection (Thirteenth Amendment) Regulations, 2026 விதிகளின்படி, இனி டெலிகாம் நிறுவனங்கள் தங்கள் மொபைல் ஆப்ஸ், இணையதளங்கள் மற்றும் அனைத்து விற்பனை மையங்களிலும் 'TRAI-Mandated Packs' என்ற தனிப் பிரிவை உருவாக்க வேண்டும். பயனர் ரீசார்ஜ் திரையைத் திறந்தவுடன், இந்த மலிவு விலை பேக்குகள் தான் முதலில் காட்டப்பட வேண்டும்.
முதலீட்டாளர்களுக்கு இது ஏன் முக்கியம்?
தற்போது பெரும்பாலான நிறுவனங்கள் அதிக லாபம் தரும் டேட்டா பேக்குகளை (Data Bundles) மட்டுமே முன்னிலைப்படுத்துகின்றன. ஆனால், இந்த புதிய விதியால் வாடிக்கையாளர்கள் மலிவான வாய்ஸ் மற்றும் SMS திட்டங்களுக்கு மாற வாய்ப்புள்ளது. இதனால் டெலிகாம் நிறுவனங்களின் ARPU (Average Revenue Per User) எனப்படும் ஒரு பயனருக்கான சராசரி வருவாய் குறையக்கூடும் என்பது சந்தை நிபுணர்களின் அச்சம்.
அடுத்த 30 நாட்கள் மிக முக்கியம்
இந்த மாற்றங்களைச் செயல்படுத்த நிறுவனங்களுக்கு 30 நாட்கள் மட்டுமே காலக்கெடு வழங்கப்பட்டுள்ளது. இந்த குறுகிய காலத்தில் நிறுவனங்கள் தங்கள் IT உள்கட்டமைப்பை மாற்றியமைக்க வேண்டும். மேலும், இந்த திட்டங்களை ஒவ்வொரு மாதமும் அதே தேதியில் புதுப்பிக்கும் (Monthly Renewal) வசதியையும் கட்டாயமாக்கியுள்ளது. இது நிறுவனங்களுக்கு சிறிய அளவிலான கூடுதல் செலவுகளை ஏற்படுத்தினாலும், வாடிக்கையாளர் நலன் கருதி எடுக்கப்பட்ட இந்த நடவடிக்கையின் தாக்கத்தை அடுத்தடுத்த காலாண்டு முடிவுகளில் தான் தெளிவாக அறிய முடியும்.