eMudhra தனது குளோபல் TLS சான்றிதழ் தயாரிப்பில் தொழில்நுட்ப கோளாறை கண்டறிந்துள்ளது. இதனால் சில வாடிக்கையாளர்கள் சான்றிதழ்களை மாற்ற வேண்டிய கட்டாயம் ஏற்பட்டுள்ளது. இந்தியாவின் DSC சேவைகள் இதற்கு பாதிக்கப்படவில்லை என நிறுவனம் விளக்கம் அளித்துள்ளது.
என்ன நடந்தது?
கடந்த ஏப்ரல் 30, 2025 அன்று நடைபெற்ற 'Key Generation' நிகழ்வில், எதிர்பாராத விதமாக பலவீனமான கிரிப்டோகிராஃபிக் கீகள் உருவாக்கப்பட்டதாக eMudhra தெரிவித்துள்ளது. இந்த கீகள் பிரவுசர் ரூட் ஸ்டோர்களில் (Browser Root Stores) பதிவேற்றப்பட்டதால், அவற்றை எளிதில் கண்டறியும் அபாயம் இருந்தது. இதனை ஒரு தனிப்பட்ட ஆய்வாளர் அக்டோபர் 17, 2026 அன்று சுட்டிக்காட்டினார்.
பாதிப்பின் அளவு
இந்த சிக்கலானது நிறுவனத்தின் குளோபல் TLS செயல்பாடுகளில் உள்ள 8 இடைநிலை சான்றிதழ் அமைப்புகளை (Intermediate Certificate Authorities) மட்டுமே பாதித்துள்ளது. இதன் மூலம் நிறுவனத்தின் ஒட்டுமொத்த வருவாயில் வெறும் 1% மட்டுமே பாதிப்பு ஏற்படும் என கணிக்கப்பட்டுள்ளது.
இந்திய சந்தைக்கு பாதிப்பா?
முதலீட்டாளர்கள் கவலைப்படத் தேவையில்லை. இந்தியாவின் டிஜிட்டல் சிக்னேச்சர் சர்டிபிகேட் (DSC) மற்றும் eSign சேவைகள் முற்றிலும் மாறுபட்ட மற்றும் பாதுகாப்பான உள்கட்டமைப்பில் செயல்படுகின்றன. எனவே, இந்திய வாடிக்கையாளர்களின் சேவைகளுக்கு எவ்வித பாதிப்பும் இல்லை என்று நிறுவனம் உறுதியளித்துள்ளது.
பாதுகாப்பு குறித்த விளக்கம்
இந்த விவகாரத்தில் தரவு கசிவு அல்லது அங்கீகரிக்கப்படாத ஊடுருவல் எதுவும் நடக்கவில்லை என்று eMudhra தெளிவுபடுத்தியுள்ளது. தற்போது, Google, Apple, Microsoft மற்றும் Mozilla போன்ற முக்கிய நிறுவனங்களுடன் இணைந்து, சான்றிதழ் மாற்றும் பணியை நிறுவனம் மேற்கொண்டு வருகிறது. இந்த செயல்முறையை எவ்வளவு விரைவாக நிறுவனம் முடிக்கிறது என்பதே பங்கின் மீதான முதலீட்டாளர்களின் பார்வையை தீர்மானிக்கும்.