WhatsApp-க்கு ஆப்பு வைக்க வருகிறதா Zoho? புதிய Arattai Business பிளாட்ஃபார்ம் அறிமுகம்

இந்தியாவின் முன்னணி மென்பொருள் நிறுவனமான Zoho, இப்போது கார்ப்பரேட் மற்றும் நிறுவனங்களுக்கான மெசேஜிங் சந்தையில் அதிரடியாக நுழைந்துள்ளது. Arattai Business பிளாட்ஃபார்ம் மூலம் நிறுவனங்கள் தங்களது வாடிக்கையாளர் தொடர்புகளையும், உள்நாட்டு வேலைகளையும் ஒரே மெசேஜிங் இடைமுகத்தில் கையாள முடியும்.

Zoho-வின் மாஸ்டர் பிளான் என்ன?

வெறும் சாட்டிங் ஆப் மட்டுமல்லாமல், இதனை ஒரு 'மிடில்வேர்' (Middleware) போல Zoho வடிவமைத்துள்ளது. அதாவது, ஏற்கனவே நிறுவனங்கள் பயன்படுத்தும் Zoho One அல்லது CRM போன்ற மென்பொருட்களுடன் இந்த மெசேஜிங் வசதியை சுலபமாக இணைத்துக் கொள்ள முடியும். இதுவே WhatsApp போன்ற சாதாரண மெசேஜிங் ஆப்ஸை விட Zoho-விற்கு உள்ள தனித்துவமான பலம்.

இலவச சேவை ஏன்?

இந்திய ரயில்வே, கல்வி மற்றும் சுகாதார நிறுவனங்களுக்கு இந்த பிளாட்ஃபார்ம் இலவசமாக வழங்கப்படும் என Zoho தெரிவித்துள்ளது. 'Digital Sovereignty' எனப்படும் இந்தியாவின் சொந்த டிஜிட்டல் கட்டமைப்பை வலுப்படுத்தவே இந்த அதிரடி முடிவை எடுத்துள்ளது.

நிதி நிலை மற்றும் சவால்கள்

தனியார் நிறுவனமான Zoho, 2025 நிதி ஆண்டில் சுமார் ₹12,313 கோடி வருவாயை ஈட்டி லாபத்தில் இயங்கி வருகிறது. இருப்பினும், இப்படி பெரிய அளவில் இலவச சேவைகளை வழங்கும் போது, டேட்டா சென்டர் மற்றும் பணியாளர் செலவுகள் அதிகரிக்கும் என்பதால், நிறுவனத்தின் லாப வரம்பில் (Operating Margin) சிறிய அழுத்தம் ஏற்பட வாய்ப்புள்ளது என்று சந்தை நிபுணர்கள் கருதுகின்றனர்.

WhatsApp-க்கு இருக்கும் மிகப் பெரிய பயனர் தளத்தை உடைத்து, Zoho தனது இந்த புதிய முயற்சியில் எந்த அளவுக்கு நிறுவனங்களை ஈர்க்கும் என்பது வரும் காலங்களில் தெரியவரும்.