உலகளாவிய சிப் தயாரிப்பு நிறுவனங்களை ஈர்க்கும் நோக்கில் 'Tamil Nadu Semiconductor Ecosystem Scheme'-ஐ தமிழக அரசு அறிமுகம் செய்துள்ளது. மத்திய அரசின் மானியங்களுடன், மாநில அரசும் கூடுதல் சலுகைகளை வழங்கவுள்ளது.
சிப் தயாரிப்புத் துறையில் தமிழகத்தை ஒரு முக்கிய மையமாக மாற்றும் நோக்கில், மாநில அரசு புதிய செமிகண்டக்டர் திட்டத்தை கையில் எடுத்துள்ளது. இந்தத் திட்டம் வேஃபர் ஃபேப்ரிகேஷன் (Wafer Fabrication) மற்றும் பேக்கேஜிங் (OSAT) ஆகிய துறைகளில் முதலீடுகளை ஈர்க்கும் வகையில் வடிவமைக்கப்பட்டுள்ளது.
இரு அடுக்கு ஊக்கத்தொகை (Two-Tier Incentive)
இந்தத் திட்டத்தின் சிறப்பம்சமே அதன் 'டூ-டியர்' இன்சென்டிவ் மாடல் தான். ஏற்கனவே மத்திய அரசின் India Semiconductor Mission அல்லது Semicon India Programme 2.0 கீழ் பயன்பெறும் நிறுவனங்களுக்கு மாநில அரசு கூடுதல் நிதிச் சலுகைகளை வழங்கும். அதேசமயம், இந்த மத்தியத் திட்டத்தில் சேராத முதலீட்டாளர்களுக்கு, தேவைக்கேற்ப தனிப்பயனாக்கப்பட்ட (Customized) சலுகைகளை வழங்கவும் அரசு முன்வந்துள்ளது.
காஞ்சிபுரத்தில் பிரத்யேக பூங்கா
இந்தத் திட்டத்திற்காக காஞ்சிபுரம் மாவட்டம் மதுரமங்கலத்தில் செமிகண்டக்டர் மற்றும் எலக்ட்ரானிக்ஸ் பூங்கா அமைக்கப்பட உள்ளது. தடையற்ற மின்சாரம், தண்ணீர் மற்றும் சிறந்த போக்குவரத்து வசதிகளை ஒரே இடத்தில் வழங்குவதன் மூலம் நிறுவனங்களின் ஆரம்பக்கட்ட முதலீட்டுச் செலவை (Initial Setup Cost) குறைக்க அரசு திட்டமிட்டுள்ளது.
முதலீட்டாளர்கள் கவனத்திற்கு...
செமிகண்டக்டர் துறை என்பது அதிக முதலீடு தேவைப்படும் (Capital-intensive) ஒரு களமாகும். ஒரு சிப் உற்பத்தியைத் தொடங்கவே பல பில்லியன் டாலர்கள் முதலீடு தேவைப்படும், லாபத்தை ஈட்ட பல ஆண்டுகள் ஆகும். எனவே, அரசு வழங்கும் இந்த மானியங்கள் நிறுவனங்களின் நிதிச்சுமையைக் குறைக்க மிகவும் உதவியாக இருக்கும். அதேபோல், குஜராத், தெலுங்கானா மற்றும் கர்நாடகா போன்ற மாநிலங்களுடன் தமிழகம் தற்போது நேரடிப் போட்டியில் உள்ளது. நிறுவனங்கள் எந்த மாநிலத்தை தேர்வு செய்கின்றன என்பது, அங்குள்ள உள்கட்டமைப்பு வசதிகளைப் பொறுத்தே அமையும்.