Spotify தனது Family Plan சந்தாதாரர்களுக்கு புதிய QR கோடு சரிபார்ப்பு முறையை அறிமுகப்படுத்தியுள்ளது. ஒரே வீட்டில் வசிப்பவர்கள் மட்டுமே இந்த திட்டத்தைப் பயன்படுத்த முடியும் என்பதை உறுதிப்படுத்திக் கொள்ளவும், கூடுதல் வருவாயை ஈட்டவும் இந்த புதிய கட்டுப்பாட்டை Spotify கொண்டு வந்துள்ளது.
ஸ்ட்ரீமிங் தளமான Spotify, தனது Family Plan சந்தாக்களில் இருக்கும் முறைகேடுகளைக் கட்டுப்படுத்த புதிய QR கோடு சரிபார்ப்பு முறையை கொண்டு வந்துள்ளது. இனி ஒரே முகவரியில் வசிப்பவர்கள் மட்டுமே இந்தத் திட்டத்தைப் பகிர முடியும். நண்பர்கள் அல்லது உறவினர்கள் வெவ்வேறு இடங்களில் இருந்து ஒரே சந்தாவைப் பகிர்ந்து கொள்ளும் நடைமுறைக்கு இது முற்றுப்புள்ளி வைக்கிறது.
எப்படி வேலை செய்யும்?
முதன்மை கணக்கு வைத்திருப்பவரின் (Primary account manager) சாதனத்தைப் பயன்படுத்தி, மற்ற உறுப்பினர்கள் QR கோடை ஸ்கேன் செய்து தங்கள் முகவரியை உறுதிப்படுத்த வேண்டும். இந்தச் சரிபார்ப்பை 7 நாட்களுக்குள் முடிக்கவில்லை என்றால், அந்த உறுப்பினரின் சேவை நிறுத்தப்படும். மேலும், விதிகளை மீறுபவர்கள் இனி 12 மாதங்களுக்கு வேறு எந்த Family அல்லது Duo சந்தாவிலும் இணைய முடியாது. இது பயனர் எண்ணிக்கையை விட, ஒரு பயனரிடம் இருந்து கிடைக்கும் வருவாயை (Average Revenue Per User) உயர்த்துவதற்கான ஒரு முக்கிய நகர்வாகும்.
முதலீட்டாளர்கள் கவனத்திற்கு!
முன்பு Netflix செய்த அதே பாணியிலான இந்த நடவடிக்கையை, லாபத்தை மையப்படுத்தும் உத்தியாகவே சந்தை நிபுணர்கள் பார்க்கிறார்கள். இருப்பினும், கட்டண உயர்வைத் தவிர்க்க விரும்பும் பயனர்கள் தளத்தை விட்டு வெளியேறும் அபாயமும் (Customer Churn) உள்ளது. புதிய மாற்றங்கள் நிறுவனத்தின் காலாண்டு ரிசல்ட்டில் எப்படிப்பட்ட தாக்கத்தை ஏற்படுத்தும் என்பதைப் பொறுத்தே இதன் வெற்றி அமையும்.