Oracle இந்தியாவில் சுமார் 3,000 பணியாளர்களை நீக்கவும், Microsoft தனது 500 ஊழியர்களை செயல்திறன் மேம்பாட்டுத் திட்டத்தில் (PIP) சேர்க்கவும் முடிவு செய்துள்ளன. AI தொழில்நுட்பத்தில் கவனம் செலுத்தவே இந்த அதிரடி நடவடிக்கையை எடுத்துள்ளன.
இந்திய தொழில்நுட்பத் துறை தற்போது ஒரு முக்கிய திருப்பத்தில் உள்ளது. செயற்கை நுண்ணறிவு (AI) மற்றும் கிளவுட் கம்ப்யூட்டிங் துறைகளில் ஆதிக்கம் செலுத்த, மென்பொருள் ஜாம்பவான்கள் தங்கள் ஊழியர் கட்டமைப்பை மாற்றி அமைத்து வருகின்றனர். செப்டம்பர் 2026 நிலவரப்படி, Oracle தனது இந்திய பணியாளர்கள் எண்ணிக்கையை சுமார் 3,000 குறைக்கிறது. கடந்த ஆண்டு மே மாதம் முதல் இந்த ஆண்டு மே மாதம் வரை, உலகளவில் அந்நிறுவனத்தின் மொத்த பணியாளர்கள் எண்ணிக்கை 162,000-லிருந்து 141,000 ஆக, அதாவது 13% சரிந்துள்ளது.
அதேநேரத்தில், Microsoft இந்தியாவிலும் இதேபோன்ற மாற்றங்கள் எதிரொலிக்கின்றன. அங்குள்ள சுமார் 400 முதல் 500 ஊழியர்கள் (அதாவது உள்ளூர் பணியாளர்களில் 2%) செயல்திறன் மேம்பாட்டுத் திட்டத்தின் (PIP) கீழ் கொண்டு வரப்பட்டுள்ளனர். பழைய விற்பனை மற்றும் நிர்வாகப் பணிகளைக் குறைத்து, அந்த முதலீட்டை AI சார்ந்த தொழில்நுட்ப வளர்ச்சிக்காகப் பயன்படுத்தவே இந்த நிறுவனங்கள் திட்டமிட்டுள்ளன.
மாஸ் ஹயரிங் மாடல் முடிவுக்கு வருகிறது
இந்திய IT துறையில் பல ஆண்டுகளாக இருந்து வந்த 'பெரிய அளவில் ஆட்களை எடுக்கும்' (Mass Hiring) கலாச்சாரம் மெல்ல மறைந்து வருகிறது. இப்போது நிறுவனங்கள் குறிப்பிட்ட திட்டங்களுக்குத் தேவைப்படும் திறமையான நிபுணர்களை மட்டுமே எதிர்பார்க்கின்றன. சைபர் செக்யூரிட்டி, டேட்டா அனலிட்டிக்ஸ் மற்றும் ஜெனரேட்டிவ் AI போன்ற உயர்நிலைத் தொழில்நுட்பத் திறமை கொண்டவர்களுக்கே முன்னுரிமை அளிக்கப்படுகிறது.
முதலீட்டாளர்கள் கவனிக்க வேண்டியது என்ன?
நிறுவனங்கள் தங்களின் செயல்பாட்டுச் செலவுகளைக் குறைத்து, லாப வரம்பை (Profit Margins) அதிகரிக்க இந்த நடவடிக்கைகளை எடுக்கின்றன. இருப்பினும், இந்த புதிய மாற்றத்தில் ஊழியர்களின் ஒத்துழைப்பு மற்றும் AI தொழில்நுட்பத்தை திறம்பட ஒருங்கிணைப்பது என்பது ஒரு சவாலான காரியம். வரும் காலங்களில் இந்த நிறுவனங்களின் செயல்பாட்டு திறன் மற்றும் AI-ல் முதலீடு செய்யப்பட்ட மூலதனத்தின் பயன்பாடு எப்படி இருக்கப்போகிறது என்பதை முதலீட்டாளர்கள் உன்னிப்பாகக் கவனிக்க வேண்டும்.