Facebook மற்றும் Instagram செயலிகள் சிறுவர்களை அடிமையாக்குவதாகக் கூறப்படும் புகாரில், 29 அமெரிக்க மாகாணங்களுடன் Meta Platforms சமரசப் பேச்சுவார்த்தையில் ஈடுபட்டுள்ளது. இந்த சட்ட விவகாரம் மற்றும் அதனால் ஏற்படக்கூடிய மாற்றங்கள் முதலீட்டாளர்களின் கவனத்தை ஈர்த்துள்ளது.
Facebook மற்றும் Instagram தளங்கள் சிறுவர்கள் மத்தியில் மனநல பாதிப்பையும் அடிமையாக்கும் பழக்கத்தையும் உருவாக்குவதாகக் கூறி 29 அமெரிக்க மாகாணங்கள் சட்டப் போராட்டம் நடத்தி வருகின்றன. கலிபோர்னியாவில் இந்த வழக்கு முக்கிய கட்டத்தை எட்டியுள்ள நிலையில், விரைவில் ஒரு சமரசம் எட்டப்படலாம் என்று எதிர்பார்க்கப்படுகிறது.
நிதி நெருக்கடியும் சட்டச் செலவுகளும்
இந்த சட்டப் போரின் காரணமாக Meta ஏற்கனவே பெரும் நிதி இழப்பை சந்தித்துள்ளது. சமீபத்திய காலகட்டங்களில் மட்டும் நிறுவனம் சுமார் $2.4 பில்லியன் தொகையை சட்டச் செலவுகளுக்காக ஒதுக்கியுள்ளது. முன்னதாக நியூ மெக்சிகோவில் நடந்த வழக்கில் மட்டும் $1 பில்லியன் அபராதத்தை நிறுவனம் சந்தித்தது. இத்தகைய தொடர் சட்டச் செலவுகள் கம்பெனியின் லாப வரம்பை (Profit Margin) நேரடியாகப் பாதிக்கின்றன.
ஆபரேஷனல் ரிஸ்க் மற்றும் ரெவென்யூ
முதலீட்டாளர்களுக்கு இருக்கும் மிகப்பெரிய அச்சம் என்னவென்றால், இந்த வழக்கினால் Meta தனது அல்காரிதம்களில் கட்டாய மாற்றங்களைச் செய்ய வேண்டியிருக்கும் என்பதுதான். ஒருவேளை அல்காரிதம்கள் மாற்றப்பட்டு, பயனர்கள் தளத்தில் செலவிடும் நேரம் (User Engagement) குறைந்தால், அது நிறுவனத்தின் விளம்பர வருவாயை (Advertising Revenue) கடுமையாக பாதிக்கும்.
மேலும், சிறுவர்களின் தனிப்பட்ட தகவல்களை முறையான அனுமதியின்றி சேகரித்து AI மாடல்களை மேம்படுத்தியதாக 'Children’s Online Privacy Protection Act' சட்டத்தின் கீழ் குற்றச்சாட்டுகள் எழுந்துள்ளன. இது வருங்காலங்களில் தரவு தனியுரிமை தொடர்பான புதிய கட்டுப்பாடுகளுக்கு வழிவகுக்கலாம்.
நிறுவனத்தின் தரப்பு
தான் எந்தத் தவறும் செய்யவில்லை என்பதில் Meta உறுதியாக உள்ளது. சமூக ஊடக அடிமைத்தனம் என்பது அங்கீகரிக்கப்பட்ட மனநலப் பிரச்சினை அல்ல என்று வாதிடும் நிறுவனம், சிறுவர்களுக்கான பாதுகாப்பு அம்சங்களை ஏற்கனவே மேம்படுத்தியுள்ளதாகக் கூறுகிறது. இருப்பினும், நீதிமன்றத்தில் நீடிக்கும் நிச்சயமற்ற தன்மையை முடிவுக்குக் கொண்டுவரவே இந்த சமரச பேச்சுவார்த்தையை முன்னெடுத்துள்ளது.
முதலீட்டாளர்கள் கவனித்து வர வேண்டிய விஷயம் என்னவென்றால், இந்த செட்டில்மெண்ட் நிபந்தனைகள் என்ன? அல்காரிதம்களில் பெரிய மாற்றங்கள் செய்யப்படுமா? மற்றும் மீதமுள்ள ஆயிரக்கணக்கான பிற தனிப்பட்ட வழக்குகள் நிறுவனத்தின் பணப்புழக்கத்தை (Cash Reserves) எவ்வாறு பாதிக்கும் என்பதை பொறுத்திருந்துதான் பார்க்க வேண்டும்.