அரசு ஊழியர்களின் திறனை மேம்படுத்த Karmayogi Bharat மற்றும் OpenAI கைகோர்த்துள்ளன. iGOT Karmayogi தளத்தின் மூலம் 1.7 கோடி ஊழியர்களுக்கு இனி AI பயிற்சி அளிக்கப்படவுள்ளது.
இந்திய அரசு ஊழியர்களின் பணித்திறனை அடுத்த கட்டத்திற்கு கொண்டு செல்லும் நோக்கில், Karmayogi Bharat அமைப்பு OpenAI நிறுவனத்துடன் ஒரு முக்கிய ஒப்பந்தத்தை மேற்கொண்டுள்ளது. இதன் மூலம், iGOT Karmayogi தளத்தில் இனி செயற்கை நுண்ணறிவு (AI) தொடர்பான பயிற்சி வகுப்புகள் இணைக்கப்படவுள்ளன.
எதற்காக இந்த முயற்சி?
மத்திய மற்றும் மாநில அரசு ஊழியர்கள் மொத்தம் 1.7 கோடி பேர் உள்ளனர். இவர்களின் அன்றாட அலுவலகப் பணிகளை எளிதாக்கவும், பொதுமக்களுக்கான சேவைகளை வேகப்படுத்தவும் இந்த AI பயிற்சி உதவும். வழக்கமான தியரி பாடங்களாக இல்லாமல், தினசரி வேலைகளில் AI-ஐ எவ்வாறு பொறுப்புடனும் திறமையாகவும் பயன்படுத்துவது என்பதுதான் இந்த பயிற்சியின் முக்கிய நோக்கம்.
செயல்பாடுகள் எப்படி இருக்கும்?
- தொழில்நுட்ப உதவி: OpenAI தனது 'Academy' பாடத்திட்டங்களை இதற்காக வழங்குகிறது.
- பயிற்சி முறை: அலுவலகக் கோப்புகளை நிர்வகித்தல், அன்றாட வேலைகளை ஆட்டோமேஷன் (Automation) செய்தல் மற்றும் குடிமக்கள் சேவைத் தரத்தை உயர்த்துவது போன்றவற்றிற்கு முக்கியத்துவம் அளிக்கப்படும்.
- அணுகல்: எந்த ஒரு மொபைல் அல்லது கணினி வழியாகவும் ஊழியர்கள் இந்தப் பயிற்சிகளை எளிதாக மேற்கொள்ளலாம்.
இந்தத் திட்டம் படிபடியாக (Phased rollout) அமல்படுத்தப்பட உள்ளது. அரசு நிர்வாகத்தில் இந்த புதிய மாற்றத்தின் மூலம் வேலையில் வேகம் கிடைக்குமா மற்றும் செயல்பாட்டுச் செலவுகள் குறையுமா என்பதைத் தான் துறை சார்ந்த நிபுணர்கள் உற்றுநோக்குகின்றனர். அதேநேரத்தில், அரசுத் தகவல்களின் பாதுகாப்பு (Data Privacy) மற்றும் ரகசியம் காப்பதிலும் கூடுதல் கவனம் செலுத்தப்படும் என எதிர்பார்க்கப்படுகிறது.