Semicon India மாநாட்டில், செமி கண்டக்டர் தயாரிப்பிற்குத் தேவையான உபகரணங்கள் மற்றும் பாகங்களை இந்தியாவிலேயே தயாரிக்க அரசு ஊக்கத்தொகை வழங்க வேண்டும் எனத் தொழில் துறை தலைவர்கள் வலியுறுத்தியுள்ளனர்.
இந்தியாவில் செமி கண்டக்டர் தயாரிப்பை அடுத்த கட்டத்திற்கு கொண்டு செல்ல, வெறும் சிப் தயாரிப்பு மட்டும் போதாது, அதற்குத் தேவையான அதிநவீன கருவிகள் மற்றும் பாகங்களையும் இந்தியாவிலேயே தயாரிக்க வேண்டும் என்ற கோரிக்கை வலுத்துள்ளது.
அரசின் கவனம் எங்கே?
தற்போது இந்தியா செமி கண்டக்டர் மிஷன் (ISM) மூலம் சிப் தயாரிக்கும் ஆலைகளுக்கும் (Fabs), பேக்கேஜிங் (ATMP) யூனிட்களுக்கும் அதிக முக்கியத்துவம் அளித்து சலுகைகளை வழங்குகிறது. ஆனால், இந்தத் தொழிற்சாலைகளுக்குத் தேவையான முக்கியமான கருவிகள் இப்போதும் வெளிநாடுகளில் இருந்தே இறக்குமதி செய்யப்படுகின்றன. இதை மாற்ற, உள்நாட்டு நிறுவனங்கள் இந்த உபகரணங்களை உருவாக்குவதற்குத் தேவையான R&D ஊக்கத்தொகைகளை வழங்க வேண்டும் எனத் தொழில் துறை நிபுணர்கள் அரசுக்கு அழுத்தம் கொடுக்கின்றனர்.
உலக நிறுவனங்களின் ஆர்வம்
இந்தத் துறையில் இந்தியாவின் வளர்ச்சியைப் பார்த்து ஜப்பானிய நிறுவனங்கள் ஏற்கனவே களமிறங்கிவிட்டன. வேஃபர் (Wafer) வெட்டும் கருவிகளில் முன்னணியில் உள்ள Disco Hi-Tec, குஜராத்தில் உள்ள பண்டிட் தீன்தயாள் எரிசக்தி பல்கலைக்கழகத்துடன் இணைந்து பயிற்சி மையத்தைத் தொடங்கியுள்ளது. அதேபோல், Advantest Corporation பெங்களூரு மற்றும் சென்னையில் தனது ஆராய்ச்சி மையங்களை விரிவுபடுத்தி, 30-க்கும் மேற்பட்ட வாடிக்கையாளர்களுக்குச் சேவை வழங்கி வருகிறது.
முதலீட்டாளர்கள் கவனத்திற்கு
இந்தத் துறை பெரிய அளவில் வளர்ச்சிக்கான வாய்ப்புகளைக் கொண்டிருந்தாலும், சில சவால்கள் உள்ளன. சிப் தயாரிப்பு உபகரணங்களை உருவாக்குவதற்கு அதிக முதலீடு தேவைப்படும்; நீண்ட காலம் ஆராய்ச்சி செய்ய வேண்டும். எனவே, வரும் காலங்களில் அரசு இந்த உபகரணத் துறைக்கு எனத் தனியாகப் புதிய பாலிசிகளை அறிவிக்குமா என்பதைப் பொறுத்தே இந்தத் துறையின் எதிர்கால முதலீட்டு வாய்ப்புகள் அமையும். தொழில்நுட்பத் துல்லியமும், ஆராய்ச்சித் திறனும் கொண்ட நிறுவனங்களே இந்தத் துறையில் வெற்றியைத் தக்கவைக்க முடியும்.